مرة كنا واقفين في الصف، الهلال كان لاعب مباراة مع أحد أندية الدوري، ما في داعى لتحديد الاسم، الزول الكان واقف معانا في الصف كان بشجع الفريق الآخر، وكان بتفاصح طول الصف وبقول لينا : الليلة بنضرب الهلال..!
المباراة بدأت ونحن في الصف، وكنا كل خمس دقائق بنسمع (كواريك) بنرفع رأسنا وبنقول للجمهور الفي الحيطة، في شنو؟ بقولوا لينا الهلال جاب قوون، زولنا الما بشجع الهلال إتضايق شديد، وشُـو بقى متل (التاء المربوطة) من الزعل، أهـا الزول دا وقت وصل شباك التذاكر، الهلال كان سجّل الهدف السادس.. زولكم عاوز يزوغ وما لاقي طريقة، وقف في شباك التذاكر مد القروش للتذكرجي وقال ليه: أديني نص كيلو عدس وصابونة وظهرة وطحنية بخمسمائة جنيه..! التذكرجي عاين ليه كدا وقال ليه يا زول إنت جايي من وين؟ الشباك دا شباك تذاكر ما شباك دكان جمعية تعاونية.. زولكم سحب القروش وطلع من الصف وقال للتذكرجي وقت ما عندكم (طحنية) الصف في شنو؟ في اللحظة دي الهلال سجّل السابع.. واحد من جمهور الهلال قال ليه يا حاج الطحنية جوّه، الوقت داك ناس مهند الطاهر كانوا ما بتفاهموا بحسموا المباراة وإنت في الصف.
