لغاية قبل الحرب ومن زمن طويل كمان تلقي في الحي في دارفوري بتلعب بحافز ( البيبسي)، يعني بكون في فريقين او اكتر وفي النهاية الفريق البيكسب بتم تحفيزه من اقرب دكان بالبارد وفي الغالب بكون ( بيبسي)، والحافز ده بتم تجميع قروشو من الفرق المشاركة في الدافوري.
والدافوري برضو عندو قانون ونظام ممكن يكون منضبط اكتر من بطولة النخبة الاعلن عنها اتحاد الكورة ومتوقع انطلاقتها خلال ساعات قادمة، بطولة مافيها اي حاجة فرق بتشارك وع حسابها الخاص.
قريت قبل شوية انه فريق الميرغني كسلا عايش وضع مأساوي قاعدين في الشارع ساكنين في الشارع، وخليك من اعلان ولاية نهر النيل تكفلها بالفرق المشاركة اللي طلع اي كلام ، الجهة المنظمة للدافوري ده وين؟ اللي هي الاتحاد، الفرق قاعدة ع حسابها، وبعضها في الشارع لانه ماعندها حق اشتراك البيبسي اقصد حق إيجار بيت لانه موضوع الفنادق لو في صعب ده لو في.
لاحظ نحن بنتكلم عن دوري ( نخبة) يعني قروش، يعني إقامة طيبة، واكل طيب، وتدريب طيب، وترحيل ظريف، وجوائز قيمة للفرق المشاركة ( 8 فرق) تبدأ من الحافز المالي للمشاركة وتتدرج لغاية ماتصل الجائزة الكبرى، لكن مع الشايفنو ده دوري ( البيبسي) بتاع الحي قيمته اعلى.
