قالوا ليك بعد أن تُوِّج الهلال خلال 45 يوماً بثلاث بطولات مختلفة ـ الدوري والكأس، إضافةً للدوري الموريتاني كبطل شرفي، ناس المريخ شالوا الصور ومشوا لمزمل أبوالقاسم قالوا ليه: الهلال حقّق كأسين (الدوري والكأس) في أسبوع واحد، ونحن ما عارفين نودِّي وشنا وين؟ أي حاجة مسخت علينا.
وحقيقة كأسين في أسبوع يوجعوا.
مزمل قال ليهم ديل ناس (قحط)!! رغم أن السوباط والعليقي من دعائم الجيش الاقتصادية المهمة والقوية.
الاتفاق الإطاري هو السبب ومزمل مشغل “auto-reply”.
مزمل قال ليهم قدموا شكوى في (جان)، قولوا دا (بعاتي) ونحن بنثبت ذلك… جيبوا طبنجة وعوض زايد وكابو شهوداً.
كابو ذنبه شنو؟
الجماعة قالوا ليه يا دكتور الهلال غلبنا 4 في الدوري… وروفا جاب ليه قوون في المريخ من سبعة أجزاء زي (ليالي الحلمية).. هدف تسبب في استقالة نادر خليل ومنير نبيل ومرتضى بتري وعلي جعفر، وجعل أهل المريخ يخططون للإطاحة بالنمير، بعد الإطاحة بشوقي غريب.
قال ليهم دا (ذكاء اصطناعي) ساكت.. ثم اتنفش وقال ليهم نحن بنثبت ذلك.
قالوا ليه المريخ (عرّد) من نهائي الكأس يا مزمل.
قال ليهم دا (انسحاب تكتيكي)، إنتوا قاعدين وين؟
الجماعة عاوزين يقوموا، مزمل قال ليهم جيبوا لي (بطيخة) ـ الموضوع دا عاوز ليه بطيخة.
أنا ما عارف (البطيخة) عاوز بيها شنو؟ احتمال يكون عاوز يقنعهم بتنظيم بطولة ثالثة وهي بطولة السوبر السوداني.
مزمل ما عارف لو كان هنالك بطولة سوبر سوف تجمع بين الهلال والأهلي مدني وليس بين الهلال وثالث الدوري السوداني وسادس الدوري الموريتاني وهارب كأس السودان.
أو احتمال عاوز يقول ليهم الهلال شال الدوري والكأس ونحن شلنا (البطيخة)، والبطيخة أبقى من الكأس.
سواقة الخلا ما في زول بيلحق فيها مزمل ـ مزمل مستعد يسوقها ليكم بعجلة واحدة، أو بدون عجل، ما عندهُ مشكلة.. زول خطير في السواقة.
سوداكال دا سره باتع، أبعد من المريخ كل خصومه ـ الوالي وحازم مصطفى وأبوجيبين والجكومي ومزمل وشغال هسه على النمير، ومازالت أموال المريخ في الاتحاد محجوزة، ومازال سوداكال هو الرئيس الشرعي ـ حازم مصطفى قنع من المريخ ومشى الأهلي مدني وقال ليهم ما في حل إلا ترجِّعوا سوداكال.
ملحوظة: بعيداً عن كل ذلك، أكيد المريخاب افتقدوا كتابات الدكتور مزمل أبوالقاسم في الرياضة ـ أنا شخصياً افتقدت أبوالقنابل القاسمي، مزمل لو كان بكتب الأيامات دي كان (بيت البكاء) بكون شكله تاني والبكاء بحرروه أهله.
نتمنى عودة مزمل للكتابة الرياضية، وأن تعود قبل ذلك البلاد لوضعها الطبيعي الذي نهوى ـ ويبقى بيننا الحب والاحترام والتقدير.
سوف تعود البلاد إن شاء الله أقوى وأعظم وأجمل، خالية من الجنجويد ـ لكن المريخ بحالته دي الله أعلم. المريخ فك شارع الأربعين ومسك شارع الموردة.
المريخ نزل من الزلط.
بي غادي قالوا دقلو سوف يكون رئيساً للمجلس الأعلى لحكومة السلام الانتقالية.. انظروا للمفارقة من دمّر البلاد وشرّد أهلها، وأشعل في ربوعها الحرب عاوز يكون رئيس لحكومة السلام.. شئ غريب.. البلد دي تقول ساخطها (جان).
نظموا ليكم مباراة بين الهلال والدعم السريع، عشان نلحِّقهم المريخ ونفرتكم ليكم واحد واحد.. دقلو.. دقلو.
جان بحسم ليكم (الدقاولة) ديل.
والجيش والهلال إيد واحدة.. والجيش والشعب إيد واحدة.
والله غالب.
الهلال حقّق ثلاث بطولات الدوري الموريتاني والدوري السوداني وكأس السودان ويمكن أن نضيف بطولة رابعة للهلال بتسجيل إسماعيل حسن المنتقل من مريخ الأبيض.
مكسب كبير.. وبطولة أخرى.
الهلال سجل (اسماعيل حسن) ، إحتمال كمان يسجل (مزمل ابوالقاسم) ويعيره لنيل شندي ـ ناس أهلي شندي قالوا ما عندهم خانة فاضية.
نسيت أقول ليكم، هسع دا اقتراح دا..؟!
