الشئ الغريب الهلال انتصر على المريخ في عصر الأربعاء بالأربعة، وفي ليلة الأربعاء انتصر السودان على نيجيريا بالأربعة، وفي الأربعتين سجّل روفا أربعة أهداف بمعدل هدفين في كل أربعة.. (روفا لي أي زول).. دبل ليهو في أي أربعة.
قالوا ليك مريخابي راكب في حافلة بُــري، وهو في الحافلة الإذاعة قدمت مدحة شيخ البرعي (مصر المؤمنة)، افتكر الإذاعة قاصداها.
نـدعـوك بالأربـعـة والكـتـب الأربـعــة
والـسـور الـمـائـة والعـشـرة وأربـعـة
بالملائـكـة السـتـة والكـرمـا الأربـعــة
بنبـيـنـا مـحـمـد والخلـفـاء الأربـعـة
والسـتـة البَـعـدهُـم والأئـمـة الأربـعــة
والفقـهـا السـبـعـة وأقطابـنـا الأربـعـة
أوتــــــاد الأرضِ فـي القِبَـل الأربـعـة
الأبــدال والنـقـبـا العشـرة فـي أربـعـة.
أحـفـظ جـوارحــي الثـلاثـة وأربـعــة
وتجـافـي المضـجـع جُنُوبـنـا الأربـعــة.
زيـل مـرض الجسـمِ فـي طبايعـه الأربعـة
بــارك أسبُـوعـنـا لـيــوم الأربـعــاء.
أيـــام الـسـنــةِ التسعيـن فـي أربعـة
وبُحُـورنـا السبـعـة وأنهـارنـا الأربـعــة.
نسلَـم مــن أربـعـة وُنحشـر مـع أربـعـة.
المريخابي القعدة في الحافلة غلبته، قال للكمساري نزِّلني، السواق وقف ليه في المحطة، المريخابي نزل لقى نفسه في سوق أربعة.. افتكر السواق قاصدها..!.
كل ما يسمع (أربعة) نفسه بكتم، المريخابي زعل شديد، وقال الهلالاب ديل وقت يمسكوا في شئ ما بفكوه، ا.
أكيد الإذاعة متآمرة معاهم والمنتخب النيجيري متآمر معاهم (المنتخب النيجيري قاصدها)، وسواق الحافلة متآمر معاهم، وهو في الحالة دي في واحد قال ليه يا أستاذ لو سمحت الساعة كم؟ لقاها أربعة، قال في نفسه والزمن متآمر معاهم.. والزول الذي سأله من الساعة قاصدها.
المريخابي دخل البيت لقى تلاتة شايلين كوتشينتهم وقاعدين منتظرنه في الصالون أول ما دخل عليهم قالوا ليه عليك الله تعال (ربِّعها) لينا، افتكرهم قاصدنها، قال ليهم والله لو كتبتها ليكم الأمم المتحدة ما (أربِّعها) ليكم، إنتوا جنيتوا؟ لو وقفت عليّ أربِّعها في (منبر جدة) ما بربِّعها.
معقولة روفا حتى عشرة كوتشينة المريخاب (فرتكها) ليهم.. ما قادرين يربِّعوها ـ الحكاية ما وقفت على مجلس المريخ، الموضوع كبر أوى ووصل نيجيريا.
قالوا ليك منتخب نيجيريا بفكر ينسحب من مواجهة الكونغو.
مريخابي بيلعب في حريق جدع أربعة أسود جروه بيها خمسين ـ كشح الورق وانسحب، وقال ليهم إنتوا يا الهلالاب في (الكوتشينة) لاحقننا.
صاحبه قال ليه في زول بفك ليه (أربعة) في زمن زي دا.
أربعة آخر الموسم ـ أقصد أربعة آخر اللعب خمسين خمسين.
