جبنا مجلس (نفطي)، جابوا مجلس (نفطي).
تسجيلات الهلال يشرف عليها نائب الرئيس، تسجيلاتهم يشرف عليها نائب الرئيس.
الهلال ضرب السرية على تسجيلاته، الجماعة اتّبعوا نفس النهج.
سجّلنا مواهب أفريقية تحت السن، سجّلوا مواهب أفريقية تحت السن.
سجّلنا حارس بوركيني، سجّلوا حارس بوركيني.
سجّلنا حارس المريخ السابق، سجّلوا حارس الهلال السابق.
سجّلنا راموس مدافع الشباب، رجعوا البرعي مدافع شبابهم السابق.
نزلنا في فندق سمارت ببورتسودان لفوا وجوا ونزلوا في نفس الفندق.
سجّلنا كابوري (ياباني) أصلي، قالوا هسع بفتشوا ليهم في كابوري (صيني) تقليد.
صلاح عادل اتعوّق وربط رأسه، محمد الرشيد اتعوّق في العضلة الخلفية، وعاوز يربط رأسه.
العليقي دا لو شفت يمقلبهم، ويقول الهلال عاوز يعيد تسجيل الريح كاريكا ـ عشان ناس المريخ يتمقلبوا ويرجعوا إبراهيم عطا.
الناس ديل من كترة تقليدهم للهلال، قالوا ليك في الأجرام السماوية، أمس الثلاثاء اقترن المريخ بالهلال.
وفي النهاية الهلال بطل الدوري والكأس في السودان، وبطل الدوري الموريتاني، والمريخ سادس الدوري.
تتعبوا ساكت، تسجيلات ومعسكرات خارجية وجاز وتطلعوا من الدور التمهيدي.
الحكاية دي بتذكِّرني حكاية الزول العندهُ نعجتين، واحدة سوداء،. والثانية بيجية، في زول سأله قال ليه النعجة بي كم؟ قال ليه ياتها فيهن السوداء أم البيجية؟
الزبون قال ليه السوداء.
صاحب النعجتين قال ليه 350 ألف جنيه.
الزبون رجع وقال ليه وطيب البيجية؟
التاجر قال ليه نفس الشئ.
الزبون قال ليه النعجة بتحلب كم رطل في اليوم؟
التاجر قال ليه ياتها فيهن السوداء أم البيجية؟ َ
الزبون قال ليه البيجية؟
التاجر قال ليه 4 أرطال في اليوم.
الزبون قال ليه وطيب السوداء.
التاجر قال ليه نفس الشئ.
الزبون قال ليه طيب النعجة عمرها كم؟
التاجر قال ليه ياتها فيهن البيجية أم السوداء؟
الزبون قال ليه السوداء؟
التاجر قال ليه سنة وشهرين؟
الزبون قال ليه وطيب البيجية؟
التاجر قال ليه نفس الشئ.
التاجر قال ليه، السوداء بتأكل البرسيم.
الزبون قال ليه: والبيجية.
التاجر قال ليه نفس الشئ.
الزبون في النهاية قال ليه السوداء دي مالها بتعرج؟
التاجر قال ليه والبيجية نفس الشئ.
هسه ناس المريخ شغالين مع الهلال بنظرية (نفس الشئ).
عندنا واحد صاحبنا زمان كان بقلد في دفعتنا ـ دفعتنا يلبس أسود هو يلبس أسود، دفعتنا يعمل ليه ركشة هو يعمل ليه ركشة، دفعتنا يعرس هو يعرس، يطلق هو يطلق، دفعتنا يشترك في القناة هو يشترك في القناة، دفعتنا يشربها سادة، هو يشربها سادة، مرة دفعتنا عمل ليه حادث في كوبري شمبات، زولنا دا دخل ليه في غرفة العناية وهو بين الحياة والموت، وقال ليه أسمع الغلطان منو؟ عشان ما أعمل لي حادث ساكت، ثم التفت نحوي وقال لي ما تخافوا عربيتي مُؤمّنة، بس عليكم الله لمن أعمل الحادث جيبوني في (نفس المستشفى).. والأولاد أضربوا ليهم بعد ما أدخل العناية المُركّزة.
