قال مدرب المريخ الصربي داركو نوفيتش في المؤتمر الصحفي لتوقيع العقود مع نادي المريخ، إنه لأول مرة يدرب فريقاً يلبس الأحمر ـ مع ذلك كان في الديربي السوداني الذي يجمع بين الهلال والمريخ بشجع (الأحمر)، رغم أنّ كل الأندية التي كان يدرِّبها تلبس الأزرق.
الجااااك!!
وقال داركو إنه يتابع المريخ من سنة 2008م.. أكيد كان عنده إحساس إنه في عام 2025م سوف يدرِّب هذا الفريق لذلك ظل يتابعه (17) سنة.
الجاااااااااك!!!
دا كله خلوه.. داركو في المؤتمر الصحفي قال إنه سوف يلعب بأربعة مدافعين ـ يكون شاهد مباراة الأربعة مسكتوا حمي (الخندقة).. لكن عاوز أعرف القال ليه الهلال سجّل مهاجم سوبر منو؟ لكي يعلن أنه سوف يلعب بأربعة مدافعين من مرحلة الإعداد، عشان عندما يواجه الهلال يكون جاهزاً.
الزول دا قال متابع المريخ أم الهلال؟ ـ عشان كلامه دا بثبت أنه مُـركِّز مع الهلال.
عموماً الخندقة ناس كلود وكول وكابوري عندهم ليها حل.. ثلاثة كافات أنا يا البلوم!!
كول دا قالوا بدخل شايل معاه دِرب ملح ودِرب سكر للباك، عشان يسعفوا أول ما يقع.
وكابوري بدخل بالسماعة.
وكان لي كلود اسألوا عوض زايد وطبنجة.
كلود بدخل بالنقالة، شوف عيني النقالات التي دخلت في مباراة الهلال والمريخ في الدامر في غزة ما شفتها.
هسع أنا جبت سيرة كرشوم براكم متحسسين.. دا (كاف) براهو.
أكيد ح تقولوا طيب علاقة (الزرازير) في الصورة بالموضوع دا شنو؟ ما في علاقة بين ود أبرق والبلوم.
أقول ليكم، عندنا قريبنا طقتو كهرباء، مشينا بيهو على الدكتور قال ملاريا.
في علاقة بين الملاريا والكهرباء؟ الظاهر الدكتور قنع من الكهرباء ظاهر وباطن، الدكتور دا قولوا ليه في حاجة جديدة ظهرت اسمها الطاقة الشمسية.
ما تلفحوا ساكت!!
