دخلت (قوقل) لقيت ليك فيروس التمهيدي ضارب ليك الجماعة 4 / صفر.
ما تقولوا قاصدها ، جاءت أربعة صدفة ساكت.
الغريبة أنا وقت أفتح المروحة بفتحها في أربعة.
قلت أفهم الحاصل، عشان العدوى ما تصيبنا ، (منظمة الصحّة العالمية (يرمز لها اختصاراً WHO) هي واحدةٌ من عدة وكالات تابعة للأمم المتحدة متخصصة في مجال الصحة).
المنطمة دي WHO قالوا عاوزة تعمل حملة للتطعيم ضد (التمهيدي).
ما تقولوا قاصدها ـ قالوا كدا.. دا شغل الأمم المتحدة.
أحسن تلموا (التمهيدي) بتاعكم دا مع آثار الحرب وتتخلصوا منه.
برنامج الحملة بيبدأ من إكتساب العضوية الإلكترونية لنادي الهلال بالإنتساب.
شوف العضوية دي مع إنها بالأنتساب لكن بتشيل منك الفتور ، ووجع الضهر، والرأس، وكسيّر العضّام ، وزغللة العيون ، والشعور بالرغبة في التقيؤ.. وحتى حالة القلق والسهر التي تعاني منها ، والإحساس بالإكتئاب ، إكتساب هذه العضوية بشيلو ليك نهائي ـ بأختصار بتشيلك (التمهيدي) تماما ، وأن كان التمهيدي مرض وراثي قاتل.
وعشان تقوي مناعتك ، حاول تحضر مباريات الهلال ، وتابع تمارينه ، بتبقي زي الطلقة.
هدف والي الدين في الأهلي الخرطوم حملة ضد كل الملاريات.
هدف والي الدين في الهلال السعودي حملة ضد اليأس والأحباط والملل.
هدف والي الدين في الترجي حملة ضد الأغاني الهابطة.
هدف والي الدين في المريخ حملة ضد الفلس وآخر الشهر.
هدف والي الدين في الموردة حملة لعودة ليالي السمر والليالي الأدبية.
ألبس أزرق ، ألبس ابيض ، أطلع من الأجواء دي ، وعيش حياتك.
أوعك من (الكريمي) ، وأي دمعة حزن لا لا.
مالك ومال السنة كلها (أي دمعة حزن لا لا).
ممكن تحضر مباريات قديمة للهلال ،عشان تمرق من دور الـ 64 دا شوية.
لكن إعتقد نحن في حاجة للتوعيّة ، مشكلتنا الوعي ، لذلك قد تكون الأزمة أزمة ثقافية وليس صحية (مالك أنت عاوز تدخل لينا في الغريق).. كنت ماشي كويس.
أسمع خليل فرح ، وردي ، مصطفى سيد أحمد ، أقرأ عبقريات العقاد كلها ،وحديث الاربعاء لطه حسين و “المرشد إلى فهم أشعار العرب وصناعتها” للبروفيسور عبد الله الطيب ، خلوه المرشد اقرأوا ليه (الأحاجي السودانية).
اليونسكو هي منظمة الأمم المتحدة للتربية والعلم والثقافة، وهي وكالة متخصصة تابعة للأمم المتحدة تهدف إلى بناء السلام والأمن من خلال تعزيز التعاون الدولي في مجالات التعليم والعلوم والثقافة والاتصال.
الموضوع دا موضوع يونسكو ما موضوع WHO.
الأزمة دي أزمة (ثقافية) ، أزمة موية وكهرباء ،وجامعات مغلقة ،ومسارح معطلة.
أنتوا فاكرين الثقافة بتتفصل عن الكهرباء والموية والأكل.
هسه حمى الضنك دي ، أزمة ثقافة أم أزمة صحة؟
افتحوا لينا جامعة الخرطوم وإستاد الهلال ،والمسرح القومي، وأسألونا من حمى الضنك والكهرباء والتمهيدي.
زمان الناس البتخش دار الرياضة أم درمان ما بتصاب بالملاريا.
مشكلة الحرب قربت تنتهي ، والتمهيدي لسع!!
الأمم المتحدة قالت: الحرب بتقيف ، لكن التمهيدي دا ، ما عندنا ليه حل.
المريخاب إنتظروا (الجاموس) ما عمل حاجة ، جابوا (البوليس) وقعدوا يشكوا ليه.
