بعد كدا ممكن (تعرِّشوا)، وممكن تركِّبوا (المكيفات) بتشتغل ليكم بدون كهرباء، ناس الهلال جابوا ليهم (سوبر)، السمكة من بحرها بطلعوها (مشوية).
الفول بتصلح بهدف أحمد سالم الثالث.
أحمد سالم جاب ليه هدف بمراية السوق ـ المرآة لا تعطيك الأبعاد الحقيقية للصورة أقصد للهدف.
كوبري شمبات، لو مشيتوا عليه الصباح بتلقوهو رجع لسيرته الأولى وزاد على ذلك بأربعة مسارات جديدة، ناس الهلال عندهم مهاجم اسمه (كوليبالي) الكباري عنده أسهل من كتابة همزة الوصل.
عندنا فكرة نطعِّـم نهر النيل (شربات)، بهدف روفا الرابع في المريخ.
مطار الخرطوم بيرجع عادي يستقبل كل شركات الخطوط، ما في مُسيرة بتفوت على كرشوم.
الحرب انتهت.
محمد وردي عنده حفلة في قاعة الصداقة بـ(جان كلود)، وود الأمين شغال في نادي الضباط بـ(أحمد سالم)، هذه الإحساس لا يشعر به إلا من تأهل لمرحلة المجموعات.
الحرب انتهت.
سنابل القمح ح ترجع ترقص مع نور الجيلاني ولوزات القطن ح تتفتّح مع موسم البقعة المسرحي.
ح نلبس جلاليب جديدة، ونفرش ملايات جديدة، ونركِّب الستائر الجديدة، ونوزع الحلاوة ونفك الشفّـع في الطرقات، وح نتبادل التهاني، كل سنة والهلال في المجموعات، السنة القادمة إن شاء الله بطل دوري أبطال أفريقيا.. 2026م.
بتوع التمهيدي معليش ما بتفهموا الكلام دا.. مرة جانا روسي قعد يرطن فينا ساعة ونص، لامن مغربت، في واحد مريخابي قال لي الروسي الما عنده رأس دا كان بقول في شنو؟
قلت ليه كان بقول والله التأهل لمرحلة المجموعات دي حلو حلاة….
قال لي ساعة ونص بقول في الجملة دي؟
قلت ليه أيوه، كمان إنتوا شن خبّـركم بالمجموعات والروس.
الحمد لله على نعمة الهلال.
الموضوع دا عاوز ليه (صابنها)، وصينية سمك (ناصية).
