موضوع القرعة دا في ناس بتحسّسوا منو، بيشعروا بالإحراج، رغم إنه مفروض الموضوع يكون ليهم عادي ـ 7 سنوات والهلال شغال بنفس المنهج (أمل قرأت، وبدر كتب).. 7 سنوات والجماعة قاعدين في الصالون يتفرّجوا، أقصى أمانيهم الهلال يقع مع الأهلي المصري!!!
الموضوع بقى عادي عندنا لو ما واجهنا الأهلي في المجموعات سنقابله في ربع النهائي، ولو ما قابلناه في ربع النهائي سوف نواجهه في نصف النهائي ـ هذا إذا كان الأهلي السنة دي عندهُ نَفَس طويل (قبضوني ليه جابوني ليه.. عاوزني أعمل ايه هنا.. ختوني في قفص كبير.. جابوني مسجون ليه أنا.. أنا ما عملت هناك شيء).
نشرب الشاي تقيل، نشربهُ خفيف، بدون سكر، بي سكر زيادة، على كيفنا.. بارد، ساخن ولا فارقة.. ما نشربه من الأساس على كيفنا.
نقابل صن داونز، نقابل الترجي، عادي، يعني ح نقابل البوليس الكيني في هذه المرحلة؟
أكيد بتحسوا بالضيق، تطلعوا من الفيس، ما تنشِّطوا النت، مع ذلك الواحد فيكم عاوز يموت ويعرف مجموعة الهلال.
بكرة القرعة ـ الموضوع كبير عليكم، ما تتكلموا في مواضيع أكبر منكم ـ حاولوا اشغلوا نفسكم بمواضيع تانية.
العام الدراسى الجديد.
الهدنة ـ دوِّروا فيها زي ما عاوزين، بس ما في زول يجيب ليهم سيرة القرعة ـ بتحسسوا من المواضيع الزي دي.
ممكن تتكلموا عن حالة الطقس ، الجو برد ـ إتكلموا عن الكهرباء، سعر اللحمة، جالون الجاز (أمل قرأت وبدر كتب)، بس ما تجيبوا سيرة الكورة ـ الناس ديل بتحسسوا، وبشعروا بي قشعريرة من القرعة.
إنتوا حكايتكم زي حكاية الزول المضروب شاكوش، قدر ما يحاولوا يبعدوه عن سيرة البحر، يقوم تاني يجيب سيرة البحر.
ملعون أبوك
دنيا أم قدود
بقت البقت
ووقعتَ في شارع الزلط
تبكي وتجعِّر
والعيون اتورّمت
يد القميص..
ضهر القميص..
كُم القميص..
حتى الفانيلة اتشرّطت
يا عبدو عيب
قوم يلا صلي على الحبيب
الواطة صبحت داير انوم
يا اخوانا لا أنا عاوز أموت أقع البحر
دي ما كانت (قرعة).
البحر يوديكم وين مع (التمهيدي) بتاعكم دا؟
بمناسبة البحر، قالوا ليك واحد غرق، بعد أربعة أيام طلّع سمك (القرموط) يشكي منو.
