المحلي داخل بربر 

هل هذا الموضوع صدفة؟

حقيقة أنا بقيت أشك في الصدف.

الواحد يجيك مخصوص ويظل مُشرِّك ليك اليوم كله، وأول ما يقابلك يقول ليك صدفة عجيبة!! 

أصلو ما في صدفة بالشكل دا. 

دي صدفة مرتبة بشكل غريب.

وقت نقول ليكم نحن أي حاجة عندنا بي نظام، بتقعدوا تغالطوا. 

أكيد انتوا ما فاهمين حاجة، وبتقولوا الزول دا بقول في شنو؟ وقاصد منو؟

أقول ليكم وانتوا أحكموا براكم ـ وأنا طلعوني منها عليكم الله ـ عشان المريخاب ديل ما يزعلوا.

طلعوني من الموضوع دا. 

في يوم الجمعة 21 نوفمبر سوف يواجه الهلال في كيجالي على (Stade Amahoro)، فريق المولودية الجزائري في أول مباريات مرحلة المجموعة في دوري أبطال أفريقيا. 

في هذا التوقيت تعالوا شوفوا المريخ بعمل في شنو؟ ـ ابحث معي عن المريخ. 

في هذا التاريخ سوف يواجه المريخ في دوري الدرجة الأولى بربر فريق الإخلاص.

اتحاد بربر قاصدها، واللّا جاءت صدفة؟

ونحن أي حاجة عندنا بي نظام.. بما في ذلك القرعة. 

هل القرعة متورطة مع ناس الهلال وقاصدة تضع المريخ في حتة بايخة؟ 

يعني ما لقيتوا غير اليوم الذي سوف يواجه فيه الهلال فريق المولودية. 

في داعي للإحراج دا؟

وقت يقولوا ليكم المحلي داخل بربر بتزعلوا.

المحلي داخل عطبرة دي سمعنا بيها ـ لكن المحلي داخل بربر دي جديدة علينا.

الحلّ بله، ما بحلكم من حكاية (المحلي داخل بربر) ـ بلوا رأسكم وابقوا رقاق.

#اللهم_احفظ_السودان_وأهله

#جان_كلود_أجمل_هدف