عندما أشاهد صورة لكرشوم وهو في حالة طيران أو في وضعية يخرج فيها من تأثير الجاذبية الأرضية، أقول دي بتوع التمهيدي ما بقدروا عليها.
عاوزين ليكم ألف سنة، عشان تصلوا للمرحلة دي، ما عاوزين نقول ليكم (ضوئية) عشان ما نحبطكم.
غايتو يا كرشوم الله شافك من بتوع التمهيدي، ديل تاريخ التأسيس ما متفقين عليه ـ وكمان الأيامات دي جابوا ليهم لون (كريمي) جديد.. ونكران منتخبات!!
مريخابي في الموسم الماضي الذي حل فيه المريخ في المركز السادس في الدوري الموريتاني، ونحن في أول الشتاء، لاقاني ليك وقال لي شفت البرد دا الليلة كيف؟
نظام بتظارف ـ عشان ما أجيب ليه سيرة الكورة.
قلت ليه مافي برد ـ لكن إنتوا ما عندكم فريق.
نفس الزول لاقاني في مناسبة، وقعدنا في صينية واحدة، قال لي شفت القرع دا مسيخ كيف؟
قلت ليه القرع ما مسيخ لكن إنتوا دفاعكم ما بنستر.
بعد كم يوم لاقاني زولكم ذاتو قال لي الأيامات دي الشبكة كعبة.
قلت ليه الشبكة ما كعبة ـ لكن إنتوا ما عندكم حارس.
زولكم بقى لمن يشوفني يخلي لي الشارع.. عشان أنا كل ما يفتح ليه موضوع بجيب ليه سيرة كرشوم.
مرة قال لي: الدولار عمل كم؟
قلت ليه الدولار عاوز بيه شنو؟ وإنتوا بتطلعوا من التمهيدي الأول.
إنتوا المريخ مشكلتهُ شنو في الدامر؟
اتغلب أربعة عصراً من الهلال، وتعادل مع الفريع الدامر في مباراة ودية، قال محسن سيد مدرب المريخ، إنّ فريقه استفاد من التجربة.
الفريع البان.. المريخ المختفي!!
المريخ المختفي عاوز يظهر على حساب الهلال، قالوا المنتخب الرواندي الذي واجهه الهلال ليس هو المنتخب الرواندي،
منطق (تمهيداب).
كدا خلونا في بربر، ما تطلِّعونا من الموضوع.
الظاهر أننا حتى في دوري الدرجة الأولى في بربر، المريخاب موعودون بـ(أي دمعة حزن لا لا).
المريخ أحسن ليه يتخارج من الدامر وبربر سريع، شكلها ح تصب!!
نقّطت في الشتاء.
ناس المريخ كل ما يسألوهم بقولوا نحن بنبني في الفريق.. بنايتكم دي ظاهر عليها بناية (جالوص)، لو دي بنايتكم أبنوا ساكت.
صحيفة (نادينا) قالت الهلال لم يواجه المنتخب الرواندي..
على كدا الفريق الذي قابله الهلال في الدامر في نهائي النخبة وفاز عليه 4 / 0 دا ما مريخ أم درمان، دا مريخ واو.
انكروا.. أصلو بقيتوا شغّالين نكر وشتل بطولات.
والفريع الذي تعادل معه المريخ ودياً في الدامر هذا ليس الفريع الدامر، دا الفريع ميلانو.
الهروب عرفناه في أم درمان بالكورة وفي دار السلام بعد التسخينة وفي بورتسودان قبل أسبوع من المباراة ـ الهروب البتعملوا فيه دا، جديد علينا.. هروب بالوكالة، نواجه المنتخب الرواندي يقولوا دا ما المنتخب الرواندي.
عليكم الله كدا بالمرة اتأكدوا لينا المولودية التي سوف تواجه الهلال في مرحلة المجموعات في ملعب (أماهورو) يوم 21 نوفمبر دي المولودية الجزائر والّلا مولودية مقديشو؟ عشان لمن يوم الجمعة نضربهم أربعة ما تنكروهم لينا.
الهلال فتح باب تجنيس اللاعبين ـ المريخاب فهموا الموضوع غلط، جنّسوا صحفيين.. مرة يبقوا موريتانيين، ومرة يبقوا صوماليين، ومرة يبقوا ليبيريين، ومرة يبقوا روانديين، ومرة يبقوا خاطف لونين، لا أقول ليكم روس، لا أقول ليكم شيك.
أنا عارف اللون (الكريمي) دا بخليهم يهربوا من المريخ.
عمركم كله شغّالين (نهواه في كل الظروف) الشفقة الدخّلتكم شنو؟
