الهلال ألحق أول خسارة بفريق مولودية الجزائري بعد 20 مباراة، مع أنّ الهلال يخوض مبارياته خارج السودان وبعيداً عن جماهيره على ملعبه الافتراضي.
حالتها دي بدون جمهور وبعيداً عن استاد الهلال!!
الدفن دا برّه (المقبرة).
لكن الاستغراب في شنو؟ إذا كان الهلال في الموسم الماضي فاز عليهم في ملعبهم ووسط جمهورهم.
الهلال تغلّب على المولودية الذي خاض 8 مباريات في الدوري الجزائري، والهلال يشارك في البطولة الأفريقية ويلعب في مرحلة المجموعات بدون دوري.
حالتها دي بدون دوري!!
جماعتنا ديل طلعوا من التمهيدي وعاوزين يدخلوا طب.
الهلال قدم عرضاً رائعاً وحقّق الانتصار، تقدم في الشوط الأول ثم تعادلت المولودية، وأضاف الهلال الهدف الثاني وحافظ على انتصاره رغم أنه لعب أكثر من 10 دقائق بعشرة لاعبين بعد طرد صلاح عادل!
حالتها دي بي عشرة لاعبين!!
لاعبو الهلال موزعون بين المنتخبات، الهلال سوف يفقد (13) لاعباً أمام البوليس الرواندي، فوفانا وسالم مع المنتخب الموريتاني ـ و11 لاعباً مع المنتخب السوداني، غادروا جميعاً للمشاركة مع المنتخب أمام لبنان ثم العودة للمشاركة مع الهلال وهو يواجه سانت لوبوبو.
حالتها دي بدون استقرار!!
تخيّلوا كل ذلك يحدث والبلاد تمر بظروف حرب قاسية.
صنداي مفتاح أي هجمة، وجان كلود جفّف باكات المولودية وبهدلهم وشرّدهم، وروفا سجّل هدفاً لا يسجله إلا روفا، والغربال سجل من أول لمسة وكوليبالي لا يبالي، حدث كل ذلك بدون القيصر فلمو.
حالتها دي بدون (الذكاء الاصطناعي).
معقولة البعمل فيه جان كلود دا من غير (الذكاء الاصطناعي).
ناس التمهيدي قالوا استعانوا ببرنامج (الترجمة) لمشاهدة مباراة الهلال والمولودية.. البعمل فيه جان كلود أصلو ما وقع ليهم.
قدر ما شرحنا ليهم، بقولوا ما فاهمين حاجة.
قالوا جان كلود بعمل في حاجات برّه المقرر.
مدرب المريخ الصربي شُوهد في المدرجات يتابع في مباراة الهلال والمولودية ـ دا المدرب القال كان بتابع في المريخ من سنة 2008م.
داركو للطيران قالوا طلع بعد المباراة وقال ليهم طبنجة معذور.
صاحبكم شغّال مذاكرة لمباراة القمة التي سوف تكون في فبراير القادم ـ وتقريباً في هذا التاريخ سوف يكون إنهاء التعاقد مع (داركو للطيران).
مرة جابوا لينا صيني، جبنا ليه ملاح ويكة، ضرب ليك الويكة دي لمن فهم حاجة، بعد ساعة ونصف لقينا الصيني في حفلة لحسين شندي قاعد يعرض صقرية وحالف ما يطلع من الدارة إلا يجلدوه.
عندنا خالنا حكمة ـ قال لينا إنتوا الويكة عملتوا ليه فيها شنو؟
قلنا ليه يشهد الله ما عملنا فيها حاجة، السر في (الجاز)، السر ما في (الويكة).
بتوع التمهيدي قالوا (جازهم) قطع بيهم في بربر.
