سمعنا بي (دبل العلوم).. لكن (دبل كيك) دبل دي جديدة علينا
محمد عبد الماجد
وعشان نحن أي حاجة عندنا بي نظام، في مباراة الهلال السابقة في الدوري الرواندي أمام البوليس، قلت ليكم القيصر إيمانويل فلمو سوف يسجل أول أهداف الهلال في الدوري ـ وإنتوا بتنسوا الكلام البقولوه ليكم ونحن ما بنتكلم ساكت ـ الهلال في أولى مبارياته لم يُسجِّل وافتتح إيمانويل فلمو اليوم في مباراة الهلال الثانية بالدوري الرواندي أول أهداف الهلال.
وكي أثبت ليكم العملية الفيزيائية الدقيقة في الهدف، وعالم البحار وأسماء في حياتنا وحقيبة الفن وأغاني وأغاني ذاتها وبرنامج من ربوع السودان، ودكان ود البصير، هدف الهلال الأول بدأ بتقدم على الطرف اليمين لأداما كوليبالي الذي لعب الكرة لأحمد سالم مبارك، لعبها الأخير وارتدت له مرة أخرى من المدافع، فباغتها أمباوك هوائية بعد معالجتها بدبل كيك على الطائر، فذهبت الكرة إلى إيمانويل الذي تعامل معها أيضاً بنفس الطريقة ـ دبل كيك تاني، ليسجل بلعبة مقصية الهدف الأول للهلال ـ أها جيبوا ليكم ترمسة شاي وصحن زلابية وتعالوا اقعدوا، بنفرش ليكم الديوان، عاوز أقول ليكم الهدف دا ذكاء اصطناعي والّلا ما ذكاء اصطناعي؟ يا متعلمين يا بتوع الذكاء الاصطناعي!!
أنا أول مرة أشوف لي هدف يسجل من “دبلين” دبل كيك.. دبل كيك في تمريرة الهدف ودبل كيك في الهدف نفسه.
دبل كيك تربيع .. دا شئ ما سمعنا بيه إلّا مع العليقي.
دا ذكاء اصطناعي متقدم.. برنامج حديث.
نحن شفع كنا ما بنحب دبل العلوم، ودبل الرياضيات، ودبل الإنجليزي، لكن هسع للأمانة مع الدبل الدبل دا فهمنا حاجة.
يا دوب دبل الفيزياء وقع لينا.
هدف فلمو ذكّرني (أغاني وأغاني) أيام الحوت ونادر خضر وأسرار بابكر وفرفور وعصام محمد نور وعاصم البنا.. قبل ما يتموا لينا البرنامج مويه.
هدف روعة.
وعشان نثبت ليكم نحن أي حاجة عندنا بي نظام، فلمو بعد الهدف الأول الذي سجّله (دبل كيك) جاء وسجّل الهدف الثاني دبل قوووون.
وقعت ليكم؟
أها الهدف التاني دا (دبل أحياء)، إذا اعتبرنا الهدف الأول (دبل فيزياء).
والله إنتوا عاوزين تجننونا.
الهدفان لعب فيهما كوليبالي وأحمد سالم دوراً كبيراً.
الموضوع دا عاوز ليه (صَـابِنّهَا) ـ فاطي سطر ما بتحلّكم مني.
