كانت (التّميمة بنت حسن) ـ شمّارة، هكذا يعرفونها في الحلة، عندما تلاقيك الصباح خارج من بيتكم، أول حاجة بتقولها ليك: الليلة مالو قميصك ما مكوي؟ ـ أولادك مشوا أهلهم؟
إذا قلت ليها مشوا أهلهم، ح تقول في مشكلة!!.
وإذا قلت ليها قاعدين، بتقول ليك طيِّب ليه ما كوا ليك قميصك؟ ـ إنت عندك مشكلة معاهم، والّلا ما عندك كلمة في بيتك؟
إذا سكت ـ إنت أكدت المشكلة.
في كل الأحوال سوف تستنبط لك مشكلة.
ما بتعرف تعمل شنو؟ عشان كدا احرص على مكوة قميصك.. هذا أسهل طرق المخارجة.
لمن ترجع آخر اليوم ـ أول شئ بتعاين للكيس الشايلو في إيدك، بتقول ليك السبعة بصلات دي جايبها من وين؟ بتعدّهم ليك بالظبط.
ومالك شايل ليك تلاتة أسودات والدنيا أول شهر.
والدكوة دي ما سمحة.
والليلة إنت أصلو ما طبيعي، مشتري ليك كيلو إلا ربع موز ـ أكيد معاكم ضيوف، آخر مرة شفتك شايل ليك موز كان قبل خمسة أشهر و13 يوماً لامن استلمت الورثة.. يا ربي طلعت ليكم ورثة جديدة ونحن ما عارفين؟
تقيف ليك على الواحدة.
ومالها عيونك حمراء كدا؟ عملت مشكلة مع المدير؟
أمس لاقيت حاجة (التميمة بنت حسن) في مناسبة، وعشان هي عارفة أي حاجة قالت لي مدرب المريخ الصربي استدعى من بربر عبد اللطيف أبيض وأحمد ميسي وأنور كوكو، الاسم الأخير دا أول مرة أسمع بيه، يطرشني ما سمعت بيه ـ ولم يستدع مدرب المريخ موسى كانتي.. قالت لي إنت عارف الموضوع دا زي شنو؟
قلت ليها زي شنو يا التميمة بنت حسن؟
قالت لي الموضوع دا زي تكون عندك مُشكلة في الإنجليزي، تقوم تدخل كورس بتاع حغرافيا ـ حاجة ما عندها أي علاقة بالإنجليزي.
قلت ليها لكن كانتي مع المنتخب.
قالت لي يعني داركو غالبهُ يصبر أسبوع أو 15 يوماً بالكتير.
ناس المريخ ديل نهايتهم يستدعوا محسن سيد من بربر لكيجالي ويودوا داركو للطيران إلى بربر أو صربيا.
