كورتنا شينة من زمنك ياهيثم وقبلك وقبل القبلك .. ومع ذلك مكتوب إننا بنحب كورتنا الشينة مع انه عارفين لا جيلك ولا الاجيال السبقتك والا الجيل الحالي ولا البعدو عدا جيل واحد حقق بطولة واحدة، وده لأسباب معلومة ارتبطت بالتخطيط والحرية الرياضية والدعم والمفهوم الحكومي عبر التاريخ المعطل في انه كرة القدم مجرد تسلية وترفيه.. ومع ده بنحبها بخرمجتها وبنعلي سقف طموحات ماعندنا ليهو كرعين انه لو جبنا مهاجم سوبر بنشيل كاس ده فهم موجود وكأنه الخلل في مهاجم او مدافع او حارس او مدرب ما منظومة كاملة داخل نادي او اتحاد بديروا الكورة بعقلية اهل الكهف، لكن اهو ولانه الكورة لعبة مابتقيف عند خسارة وخروج دور اول او دور تمانية، ملتفين حولها، وبنشجعها وبنزعل ونحلف تاني مانشوفها لكن بكره نرجع ونصفق للفوز ونبني احلام ونرفع تاني سقف الطموحات .. كورة شينة ياسيد هيثم لانك قاعد فيها بي ( باص) ماسك بيهو الناس وبهتفوا ليك سيدا وسيد ابوها ماهو ده فهم برضو خلاك حاجة في الكورة .. مع انه ماعندك ارقام محفوظة غير انك بتعرف تلعب الباص، وده بعد ظهر لاعب زي يوسف محمد خلاك ورا في صناعة الأهداف في وظيفة هسي بنشوف في العالم بتعمل شنو في صناعة الفرص .. ماعلينا بس عشان تعرف انه ده فهم بخلي لاعب زي حمد كمال من أفضل اللاعبين المروا في تاريخ الكورة السودانية قدرات وإمكانيات مهولة مالقى ربع اللقيتو لانه بس مالعبها صاح مع الإعلام وانت ماسك الدنيا بي ( باص)، باص ورانا كيف انه منظومتنا مسوسة وغير قابلة للإصلاح لدرجة انك صدقت انك الهلال تقعد فيهو وتقوم علي كيفك معتقل النادي والجماهير والحلة والجيران وجيران الجيران في سبعطاشر سنة جيت النادي ماشي بكرعينك طلعت منه تحمل صفة اللاعب الاغني في الكرة السودانية بدل البيت عمارة عمارتين وشقة شقتين وفيها ايجارات بالدولار. سبعطاشر سنة عملت أسوأ سابقة عرفتها الكورة وانت مجرد لاعب كورة علاقتك بالنادي عقد عمل، استغليت هشاشة الوضع وقلة الفهم واستغلال الفرصة لتصفية حسابات ادارية يومها اجتمعت المصالح لصناعة وهم فوق معادلة الكورة انك اكبر من النادي وانك من يملك القرار باقذر عملية تحريض وفضيحة أمام العالم وظفتها الأجهزة الأمنية لصالحها دعم شغل الناس عن ازماتهم الحقيقية وانت طبعا حريف في اللعب ده استغلال النفوذ الديني والسياسي واللعب ع الخلافات الرياضية ، ولكن الضربة كانت قاضية ومؤلمة لما اتشطبت وتم طردك من النادي والفريق، الغريب انك ماكنت راؤول غونزاليس أيقونة ريال مدريد ورمزه لما جاء مورينيو وقال ماعندك مكان معاي طلع بهدوء ومشى لعب في كم دوري تاني ماقال انا مولود في النادي ولعبت من عمري خمسة سنة واقعد ويمشي مورينيو..
ممكن اكتب فيك كتاب كيف كنت بتمشي تسجل بدون شروط وتاخد اعلى قروش وممكن نحكي قصة عقدك فترة صلاح ادريس 14 مليون جنيه وكيف اخدتها بمساعدة اسامة عطا المنان 700 مليون لما كانت قروش.
قعدت في استوديو بشوفو ناس كتار حول العالم نزعت فيهو لأول مرة في تاريخ تحليل المباريات شرف الوطنية عن لاعبين لانهم اتغلبوا تلاتة من الجزائر .. وانت اتغلبت بالخمسة والستة وقلت انا سيد الهلال وسيد ابوهو، عملت فضيحة مابقع فيها محلل مبتديء تصف لاعبين المنتخب بالخيانة الوطنية ياخ دي أكبر أذية ممكن تكون عرفتها الملاعب في العالم، وهل كنت وطني وانت بتفشل في الملاعب طوال سبعطاشر سنة بدون انجاز حقيقي؟ من الاداك الحق في توجيه مثل اتهام بهذه الخطورة قول اتغلبوا تمانية، تسعة، عشرة عشرين ذاتو .. انت منو البتوزع في صكوك الوطنية يمين وشمال ولا فاكر تحريضك على الحرب وانت الرياضي المفروض تكون زي لعيبة كبار لعيبة العالم الدعموا السودان وطلبوا ونادوا بانقاذه مش بالتحريض ودعم الحرب فاكره ده بخليك وطني والباقين خونة، دي عقلية عفنة وذهنية فقدت الاتجاه، اللاعبين عارفين حقهم وين؟ وكيف حوافز التأهل للشان وبطولة الامم والبطولة وقروشنا الدفعها البرهان مابتصلهم، ياتو ظرف استغلوا لاعبين اتاهلوا لكل النهائيات الأفريقية وعربية عدا كاس العالم اللي قاتلوا فيه بشرف، وواصلوا دون كلل او ملل كانوا بطالبوا وبضغطوا لانه عارفين الحق بتاكل والوعود في الهواء، مئات الالاف من الدولارات حقهم ومجهودهم وين الاستغلال، ديل تم استغلالهم وسايقنهم لغاية البطولة تنتهي بخروج المنتخب وبعدها كأنه ماشافوهم .. ومع ذلك لعبوا وقاتلوا واجتهدوا بشرف في حدود إمكانياتهم ماشعرنا انهم اتخاذلوا ولا تواطؤ.. بالعكس تمت تصفية حسابات مع بعضهم بعدم اشراكهم لانهم طالبوا بمستحقاتهم المالية .. لو في صاح يرفضوا يلعبوا المباراة الجاية والبعدها عشان العالم كله كم العفن والفساد المعشش في الكورة السودانية وكيف تسير ومنو المستغل والتم استغلاله .. اللعيبة شالوا شرف المنتخب وكانوا في موقف افضل منك وأشرف من موقفك وانت اصلا ماعندك شرف المواقف وده تاريخ كله تصفية حسابات .. واضح إنه ناس البي ان سبورتس مستمتعين بالتهريج والاساءات والتجريح البتوجهو للعيبة منتخبنا وعندهم انت مادة تعكس حجم مأساة كرتنا .. نحن بكورتنا الشينة مابنقبل تقليل من قيمتها لأي كان في اي مكان في ستوديوهات او كتابة بيعرف حجمه الحقيقي وده شعور طبيعي .. تخيل كيف يكون الحال لما تجي الإساءة من واحد نتاج حقيقي لازمة الكرة السودانية، لاعب ومدرب ومحلل.
