لم تزدهم الحرب إلّا غالباً
محمد عبد الماجد
الناس ديل كل ما عصرت علينا الحرب، هم عصروا نحو القمة، تزيدهم الصعاب قوةً، وتمنحهم المصائب متعةً، هم لا تزدهم الحرب إلّا غالباً.
صمودهم غريزة، وثباتهم مبدأ، وجمالهم في كل العيون… حايم في الطرقات يقالد في الناس.
تسكرني نشوة انتصار الهلال، فأضع (النظارة) في الشاحن، وأضع (الموبايل) في عيني.
أولِّع الملايا واتغطى بالمكواة.
أشوف بي نخرتي وأشم بي عيوني.
أشرب الجلابية وألبس كباية الحليب الكبيرة.
أجر المجرور بالضمة، وأكسر الفاعل لمن عينه تطلع.
عندما ينتصر الهلال، أفتح نشرة تلاتة عند التاسعة.
تبدو العاشرة مساءً، مشرقة جداً، تزغزغ العصافير، أو لا تزغزغ. أولاد المدارس يطلعوا الفطور, أعاين في الساعة، أقول (الجان) دا عمل شنو في الساعة؟
مالها جابت ليها شمس في نصف الليل.
لو كنت وزير التربية والتعليم لأضفت لمقررات الشهادة السودانية هدف جان كلود التاني، وأغنية وردي المستحيل.
امتحانات الشهادة السودانية السنة دي مكشوفة.
لو كنت وزير الدفاع، لقدمت (كرشوم) في طابور حربي لأمنحه وسام النيلين.
لو كنت وزيراً للثقافة، لأقمت مهرجاناً شعبياً بفرحة الغربال بعد الهدف الأول.
لو كنت وزير الصحة لصرفت لكل الناس انتصار الهلال للوقاية من المرض.
لو كنت وزير الخارجية لاختزلت الدبلوماسية كلها في فدائية صلاح عادل وفي شجن عثمان حسين.
ستات الشاي في شارع النيل، قولوا ليهن قهوتن اعملنها بي (روفا) خفيفة.
كلِّموا النحل ليأخذ رحيقه من هذا الانتصار ففي ذلك شهد لا مثيل له.
كلِّموا دودة القطن، لتغزل لنا من ذلك الفوز مجداً جديداً.
سوف نصنع عطراً جديداً، ينافس عطور باريس ودعاش النيل.
كلِّموا فراش هلاوي وعصافير الحلنقي وقماري سيد خليفة وحمام حمد الريح وملك طيور الجابري قولوا ليهم بكرة إجازة رسمية.
اخدوا راحتكم في التغريد.
كلِّموا طير صلاح أحمد إبراهيم المهاجر عشان يرجع، وقمري سليمان عبد الجليل قولوا ليه ما في داعي للبكاء والنواح.
البلد سوف ترجع.
ح نرجع أفضل.
أضيفوا إنتاجية جديدة لسُكّـر كنانة، واعملوا وردية إضافية لمصنع سُكّـر الجنيد.
والحفلات مدوها إلى أن تشرق.
قولوا للتبلدية في الأبيض السنة دي ثمارك علينا، وحدِّثوا نخيل الشمال، وقولوا ليه مع التمر السنة دي بتثمر جائزة نجم المباراة.
النخل السنة دي بشيل ميداليات ذهبية.
سوف نضيف لنور الصباح وفجره البازغ خطاً أزرق رفيعاً، وسوف نضع في المساء بصمة بيضاء.
ح نوزع في كل المستشفيات العافية وفي كل الملاجئ الفرح، وسوف نجعل الحصة الأولى في كل المدارس عن نادي الحركة الوطنية.
ح نخبز الكعك ونقسم الحلاوة وأي زول يلاقينا بنقول ليه كل سنة وإنت طيب.
