صدارة المريخ في أي بطولة أو منافسة بتذكرني بي “مكوة الجيران”؛ تجيبها عشان تكوي بيها قميصك، وقبل ما تكمل مكوة القميص، يرسلوا ليك (الشافع) يقيف في رأسك ويقول ليك: “عايزين المكوة”.
في جيران ما عندهم صبر!
المريخ أمس الساعة حداشر ونصف مساءً تصدر الدوري الرواندي، والليلة الساعة الثامنة مساءً فقد المريخ الصدارة؛ يعني بعد أقل من 24 ساعة، عاد المريخ إلى وصافته.. أو إلى مكانه الطبيعي.
الكلام دا حصل في العيد، حتى ونحن في هذا اليوم المبارك، سحبوا منهم الصدارة.
ومن الذي سحبها؟
سحبها الجيش.
الموضوع دا زي موضوع الجيش والدعم السريع… الدعامة يعلنوا عن إسقاط مدينة ويحتفلوا بذلك ويتصوروا أمام بوابة القيادة، وسرعان ما يستردها الجيش ويتقهقر الجنجويد.
الجيش الرواندي استلم الصدارة، لكن هلال الشعب والحركة الوطنية سوف يسترد الصدارة إن شاء الله عندما يعود ويلعب مؤجلاته.
الناس ديل أمس احتفلوا وابتهجوا بتلك الصدارة المؤقتة، وفجأة الليلة انسحبوا.. اختفوا وين ما عارف؟
هذه أسرع صدارة يتم تجريدها من قبل الجيش، بعد احتلالها قبل (24) ساعة من قبل المريخ… صدارة راحت قبل أن يكمل (الكعك)… طبعاً أي ناس تمشي ليهم تاني يوم في العيد، بيجيبوا ليك (حلاوة) ويقولوا ليك (الكعك) انتهى؛ المعنى إنت أول يوم في العيد كنت وين؟ وفي الغالب (الكعك) ما بكون كمل في اليوم التاني، بكونوا داسِّنو للناس العزاز عليهم.
كعك المريخ انتهى يوم العيد… أو ربما الكعك داسِّنو للهلال.
عموماً الهلال هسه ما فاضي ولا عنده ليكم زمن، نحن مشغولين بحاجات أكبر، بنخليكم إنتو والجيش الرواندي تتبادلوا في الصدارة، إلى أن يعود سيد البلد ويستلم “تسليم أهالي” صدارة الدوري الرواندي إن شاء الله.
عندنا قريبنا، اشترى ليه عربية ووقفها قدام البيت، وبقى كل يوم العصر يشغل محمود عبد العزيز ويفتح أبواب العربية، ويلبس البرمودة ويشيل الفوطة والجردل ويقعد يغسل فيها.. جارتنا (التليجة بنت عمر) الكلام دا ما عجبها، لبست توبها ومشت عليه وهو بغسل في العربية وقالت ليه: “العربية دي اشتريتها كاش أم بالأقساط؟”.
قال ليها: “بالأقساط”.
قالت ليه: “وكت بالأقساط، الفصاحة ليك في شنو؟ يا ولدي ما تستعجل على غسيلها، لو ما كملت قروش الأقساط ما تغسلها، الظروف ما معروفة، وناس الحلة بيشمتوا فيك”.
البيعملوا فيه ناس المريخ، نفس الشيء البيعمل فيه الزول دا.
يا ناس المريخ لقيتوا الصدارة كيف؟ ما تتعودوا، تاني ما بتشموها.
