كأس البلدية .. الله شافُـهُ من فولمو

يوم 9 نوفمبر الماضي، احتفلت الصفحة الرسمية للمريخ بكأس البلدية الذي فاز به المريخ يوم 9 نوفمبر 1934م.

سبحان الله تقول كانوا حاسين.

تقول كانوا عارفين.

إحساسهم عالي.. وقلوبهم خفيفة.

قاعدين على كأس البلدية.

من سنة 1934م.

معقولة من الوقت داك، المريخ ما شال ليه كأس.

غايتو من الحرب دوّرت، تاني ما شافوا ليهم بطولة، مع الخروج بصورة دائمة من الدور التمهيدي.

عندهم تهميدي في الكبد.

بعد يوم واحد من احتفال المريخ بكأس البلدية 9 نوفمبر 1934م، أعلنت لجنة الاستئنافات يوم 10 نوفمبر عن عودة كأس الممتاز للبطل الذي تُوِّج به ميدانيًا.

كأس الممتاز للموسم 2025 – 2026م وليس عام 1934م.

الخيرين نزلن تواليًا في الصفحة الرسمية للمريخ.

خبر كأس البلدية.

وخبر كأس الممتاز العائد الى دياره.

الدكتور علي عصام، في كأس البلدية لحقهم.

في كأس البلدية، ما عاوزين تريِّحوهم.

أحمدوا الله أن فولمو ما شاف الكلام دا.

إذا كان فولمو قبل التسجيل في المريخ بقمة الممتاز، كان قاصرًا، في 9 نوفمبر 1934 جد جدو يكون غير موجود.

الله شافكم.

التاجر وقت يفلس برجع لدفاتره القديمة.. لكن كمان ما لدرجة ترجعوا لينا للعام 1934م ولكأس البلدية كمان.

ظاهر عليه من الاسم كأس مكتبي.. بتحبوا إنتوا الحاجات دي.

البلدية نحن غير الجبايات ما بنعرف ليها حاجة.

لماذا لا يحتفل المريخ بذكرى كأس سد مروي..؟خاصةً أنّ الكأس كان من ذهب.

الغريبة باعوه في مصر.

أصلو أي ذهب من البلد دي بطلع على مصر.

متعودين على كدا من يومهم.

غايتو لو عاوزين يحتفلوا بذكرى كأس مروي إلا يحتفلوا بيه في المتحف القومي المصري.

ناس المريخ هسع قنعوا من كأس الممتاز.. قالوا يحتفلوا بكأس البلدية.

الغريبة ماشين (كاس).

عشان شنو ما عارف؟

خسارة (جاز) ساكت.