دخلوا بفرصتين وشكوى

مريخابي قال لي سمسار : عاوز لي شقة.. غرفتين ومكتب!!

السمسار.. قال ليه : عندي شقة فاتحة على ميدان.

المريخابي قال ليه: دي أبعدني منها.

قلت ليكم قبل كدا ـ نحن ما عندنا حاجة بتقع واطة.

نحن أي حاجة عندنا بي نظام.

كلامنا زي جدري القيح البفقع!!

قلت ليكم.. ولكن إنتوا بتحبوا الغلاط زي (شية الجمر).

دخلوا بفرصتين وشكوى.. فوز المريخ يكسب الدوري.. وتعادله يكسب الدوري.

وشكوى مضمونة في نظرهم.. يكسبوها يكسبوا الدوري.

الفرص التي دخل بيها المريخ للمباراة تدخل طب جامعة الخرطوم.

تدخل الكونغرس الأمريكي.

الدوري قدموه ليهم في طبق من فضة.

أم مغد الكاملين.. الفلاح عطبرة.. الأهلي مدني أصلو ما قصروا مع المريخ.

فتحوا ليهم الشباك.. والدخيري فتح ليهم الباب.

خدمة في الميدان خمسة نجوم وخدمة في المكتب خمسة نجوم.

لكن فولمو رأسه قوي زي الحجر، ما بسمع الكلام.. كان عندهُ رأي تاني.

الولد قاصر، وعندهُ فهمهُ الخاص.

قدر ما قلنا ليه الكلام دا غلط.. والناس ديل في مقام أعمامك ما سمع الكلام.

سجل هدفهُ وما اشتغل بي زول.

هدف من عصرًا بدري.

فقدوا الفرصتين في الملعب.. جروا على المكتب.

الدخيري ما بقصر.. شغال إشادات تقول في جمعية أدبية.

الدخيري أظنه بفكر يبقى شاعر.

إنتوا في الملعب ما عملتوا حاجة.. يعني عاوزين تعملوا حاجة في المكتب.

فقدوا الفرصتين ومرقوا يفتشوا فيها في المكاتب.

فقدوا الشكوى مع البوليس.. ما اقتنعوا.. رأسهم قوي.. عشمهم كان كبير في (الدخيري إشادات).

فقدوها بقرار من لجنة المسابقات، ثم فقدوها أخيراً بقرار من لجنة الاستئنافات.

أكتر من كدا نعمل ليكم شنو؟

فقدوا الفرصتين.

وفقدوا الشكوى ثلاث مرات..

مرة مع البوليس الكيني.

ومرة من لجنة المسابقات.

ومرة من لجنة الاستئنافات بعد طلب الفحص الذي تقدم به الهلال.

الناس ديل الميدان بنسحبوا منه.. والمكتب ما بنستروا فيه.

الدخيري يعمل شنو؟

الدخيري يبقى ليكم حارس مرمى.