مقالات

اقدِل يا صقر خلي الرخم قاعدين

محمد عبد الماجد

عندما شاهدنا محمد المصطفى يحرس مرمى المنتخب السوداني في تصفيات كاس العالم أمام الكونغو والسنغال ، وبعمل في حاجات “غريبة” لا تخضع لقانون الجاذبية الأرضية ـ قلنا الزول دا من وي وين.

ما صدقنا ، واستغربنا من مقدرات ود المصطفى ـ معقولة في حارس مرمى في السودان بهذه الإمكانيات؟

هي البرازيل قلبت حراس مرمى؟؟

محمد المصطفى كان بطلّع في الكورة متل “الجبنة” وكان هو يَتَقَافَزُ في الأجواء مثل “الحدية” ما في شاردة أو واردة بتفوت عليه ، وكأن مرمى السودان يحرسه نفر من الجن.

في دواخلنا تمنينا أن نشاهد محمد المصطفى في الهلال ـ, كان ود المصطفي وهو يلعب في فريق كبير مثل المريخ “أمنية” لنا ، كانت كل أمنياتنا هو أن نراه في الهلال ـ وطبيعي نحن أي حاجة سمحة نتمناها للهلال.

الموضوع كان صعباً وهو يلعب في فريق في حجم المريخ ، لكنه كان “أمنية”، والحقيقة كان “أمنية مستحيلة”.

الهلال رجل صالح ـ المريخ فجأة قام اطلق سراح محمد المصطفى لفريق عزام التنزاني.

معقولة!!! بالغتوا لكن!!

الناس ديل جنوا ؟

الهلال رجل صالح ـ محمد المصطفى تعرض لإصابة “قدرية’ مع المنتخب ابعدته أكثر من تسعة أشهر من الملاعب ـ معقولة عينا حارة ـ ابداً عينا ما حارة فهذه الإصابة كانت سبباً في أن يتخلى عنه فريق عزام ، لينتقل محمد مصطفى للهلال بصفقة رابحة (ما عارف العليقي عملها كيف)؟ ، حيث انتقل مهاجم الهلال التونسي الطيب بن زيتون والحارس العاجي فوفانا إلى عزام مقابل انتقال محمد مصطفى للهلال ، يعني الصفقة لم تكلف الهلال حاجة.

الهلال رجل صالح ـ محمد مصطفى قطع الزلط باللفة.

مرت الأيام ولفت ونحن قاعدين نتابع في مباريات منتخب السودان تحت 20 سنة في بطولة سيكافا ـ ربك رب الخير ، في الحرب دي نقوم نشوف لينا معجزة كونية جديدة في حراسة المرمى.

حاجة كدا خلطة بين رشاقة الأسطورة حامد بريمة وقوام المعجزة أحمد النور.. مرة يبقى لي أحمد آدم ومرات يبقى لي أحمد النور ـ أحمد ثابت ، المتغير آدم والنور.

مرات يبقى لي آدم ومرات النور.

حارس مرمى صغير في السن وطويل في القامة وعنده شخصية وكاريزما ، حارس أعاد لينا تاريخ معركة كرري ، حارس أسد في المرمي ـ يلقط في الكور متل العجور…تشوفه في الانفردات تقول “جبل” ، في العكسيات “صقر” ، في التسديدات “سد” ، وهيبة كدا في منطقة الجزاء ، في الضربات الترجيحية هدوء وتركيز والرجاء مراجعة خدمات المشتركين.

ولا تفكر.

حارس مرمى أي مهاجم معاه يطلع بهذا التقدير (لم ينجح أحد).

ما شاء الله أي حاجة متميز فيها.

دا جبتوه من وين؟

عفريت في المرمى.

الهلال رجل صالح ـ قمنا خلينا أي حاجة بطلنا شغلتنا واتمنينا مصطفى القدال في الهلال.

بقى لينا حلم.

محمد المصطفى كان “أمنية’ ومصطفى القدال كان “حلم”.

والحمد لله ربنا حقق لينا أمنياتنا وحقق لينا أحلامنا.

الهلال رجل صالح.

الصقر الذي قدل في سيكافا وكان أحد أهم أسباب فوز السودان بهذه البطولة انتقل الى الهلال… الرخم طبعاً كل المهاجمين الذين فشلوا في الوصول إلى مرماه…(لم ينجح أحد).

أمنياتنا اصبحت “حقيقة” ، وأحلامنا في وجود العليقي أصبحت “واقعاً”.

يعني الواحد ما يحلم؟؟

والله اقوم احلم ليكم بكأس دوري ابطال أفريقيا اجيبوا ليكم زي “الفرة”.

الحمدلله على نعمة الهلال.

مصطفى القدال ـ مثل كرشوم ومحمد المصطفى وكانتي أهم وأروع صفقات الهلال في السنوات الأخيرة.

الموضوع دا عاوز ليه ـ صابنها ـ عشان الواحد يأخد رأحته في الكلام.

اظهر المزيد

مقالات ذات صلة

زر الذهاب إلى الأعلى
error: النسخ ممنوع