نظرت في مجموعة الهلال بالدوري السوداني وجدت الهلال صدارة.
وكذلك في جدول الدوري الرواندي لقيت الهلال صدارة.
وفي مجموعة الهلال بدوري أبطال أفريقيا أيضاً وجدت الهلال صدارة.
في الدوري السوداني بتلعب مع هلال الساحل والتقدم بورتسودان والميرغني وكوبر والشرطة القضارف، وفي الدوري الرواندي بتلعب مع الجيش والبوليس ورايون سبورت والمريخ، وفي دوري أبطال أفريقيا بتلعب مع صن داونز وسانت لوبوبو والمولودية، وفي كل هذه المنافسات بمختلف أنديتها، الهلال في الصدارة.
صدارة الهلال لكل الدوريات دي زي شنو ما شاء الله.. الحكاية دي زي:
تفتح التلاجة تلقي ليك باسطة.
تفتح الدولاب تلقى دولارات.
تفتح التلفزيون تلقى وردي.
تفتح التلفون تلقى إشعار بنكك الأخضر.
صدارة في أي حتة ما شاء الله.
اللهم أدمها (صدارة) واحفظها نعمة من الزوال.
صاحبنا جابر ود التكيل، مشى ليه مناسبة وتقل في العشاء، أي صينية بتمر عليه بنزِّل منها (3) صُحُون كوكتيل، أي صينية بارد ينزل منها (4) علب بارد، زولكم ضرب صاح، لمن اتنفخ ووزنه زاد في المناسبة (فوري) عشرة كيلو، الجماعة في الحفلة وقت بشيلوا العريس بقول ليهم شيلوني أنا والله رأسي ما قادر أرفعه.
إنت يشيلوك على شنو يا ود الناس؟ ـ كل سنة طالع لينا من التمهيدي.
