في حاجة تدور في الخفاء لتمرير أجندة تخص نادي الهلال من الراسمالية الطفيلية المسيطرة على النادي لصالح سلطة العسكر ( العسكر للثكنات والجنجويد ينحل).
لما يطلع أمين عام النادي دكتور حسن علي عيسى بدون مناسبة ويقول ماعندنا مانع سلمونا 30 الف فدان القالها إبراهيم جابر وبنسلمكم نادي واستاد الهلال.
تفهم شنو؟ يعني نفهمها لو كانت سلمونا استاد بمواصفات فيفا نسلم الاستاد والنادي وده الطبيعي، استاد مقابل استاد، ثم منو القال معايير رخصة الاستاد محتاجة مساحة؟ ومنو القال الهلال بمساحته الحالية مابنفذ المعايير المطلوبة من وين جاء الكلام ده؟ بعدين انت منو؟ واجتمعت متين عشان تقرر؟ وهل ده قرارك اجتمعت او لم تجتمع؟.
أسئلة مجاوب عليها .. نجي نربط توجهات أثرياء الحرب في الإدارة الهلالية المتناغمة مصالحها مع الإدارة العسكرية، ودي برضو بتلقاها في الإعلان المجاني في فنيلة الفريق لوحدة من وحدات الجيش في أكبر عملية فساد إداري ومالي بعسكرة الفريق لصالح البزنس الجامعهم مع القيادة العسكرية.
ده نادي الهلال المستقل، الجيش يعمل إعلانه بقروش وإلا في مقابل بتاخدوهو امتيازات في سوق وتحديداً سوق الوقود، المشكلة أنه لتمرير مثل هذه المدمرة والخطيرة أنهم بقدموا موظف زي دكتور حسن علي عيسى يشيل ليهم وش القباحة.
ونفسه الدكتور اللي تم الإعلان عن رئاسته للجنة تعديل النظام الأساسي وده برضو محاولة لاستغلال ظرف الدمار الحاصل في البلد وانتصارات النادي الأفريقية، لتعديل نظام الأساسي وتمرير أجندة لصالح الرأسمالية الطفيلية.
لكن قبل ذلك يفترض يادكتور حسن تبدأ بالإعلان عن أنه مجلسكم الحالي غير شرعي ويجب حله لأنه مخالف للنظام الأساسي ونبدأ بيك أنت يادكتور أنت أمين عام منتخب في ياتو نظام أساسي لاقاك أمين عام منتخب؟ أو أمين مال منتخب؟ النظام الأنت قاعدبيهو بصمت مخجل من الاتحاد السوداني مخالف لنظام الفيفا والكاف والاتحاد السوداني، انتخاب سكرتير أو أمين عام وأمين ده من الماضي اتجاوزوا الزمن حالياً الانتخاب في الرئيس ونائبه البقية موظفين بأجر يادكتور .. فهل يطبق الهلال ذلك؟ لنا عودة.
