اتحاد الكورة وعن طريق أمينه العام مجدي شمس الدين أتقدم بي طلب لتلفزيون السودان لنقل مباراة الهلال والمريخ في ختام دوري النكبة.
وفعلاً نكبة، أقسم بالله كورة شراب في دافوري حلة مابديروها كده.
واضح إنه القرار عسكري أو من حكومة العسكر، الاتحاد كورة كورة طالب التلفزيون قروش ديون متراكمة لدوريات سابقة بعقود رسمية تصل ملايين الدولارات ما مليون واحد.
والاتحاد نفسه عمل حركة شعر ماعندو ليهو رقبة قال ماف نقل تلفزيوني وماف بث مجان للدوري مالم تسدد المستحقات المالية الحالية.
القديم المابسقط بالتقادم ماجابو ليهو سيرة، الجديد ما ألتزم التلفزيون حصلت حركة سيف الكاملين وتصريحاته الحدها لسانو.
المؤكد اتصال من عسكري نافذ ، هوي ياناس الاتحاد انقلوا الكورة دي بدون نقاش جداً سعادتك، سؤال بس البرهان جاي، أكيد لكن لو ماجاي انقلوها في رأي تاني؟ لا ابداً جداً سعادتك .. لو قلت استقيلوا مابتستقيلوا .. ليه؟ مصالحكم معاهم.
المهم بهدلتوا الكورة وبشتنتوها، وطلعتوا ميتينا ذاتوا .. ياخ اختشوا، اختشوووا ، لو كأس عرقي بتكون ضوابطوا ونظموا أفضل مليار مرة من المرمطة الاتمرمطتا الكورة معاكم.
