عندما يموت شخص ويكون لذلك الميت أقارب ، إخوانه وأخواته وأبناؤه خارج البلد ، يحدث أنه كلما يصل أحدهم للعزاء يتجدد الحزن والبكاء ـ وكلما حدث هدوء واستقرت الأوضاع شيء ما ، والناس سكتت أتى أحد الأقارب من بعيد فجدد الأحزان ، والنسوان طقن الكواريك ، والثكليبة دورت ، الموضوع دا ممكن يستمر سنة.
نسأل الحاصل شنو ؟ يقولوا ليك خال المرحوم وصل من عطبرة ، وهكذا دواليك.
هذا ما حدث في هدف فولمو ، المريخاب كلما نسوا وطلعوا من الحالة ، تقوم الأحزان تاني تجدد عليهم ، ويطقوا الكواريك ، نقول الحاصل شنو؟
يقولوا لينا : هدف القيصر.
إنتوا براكم بتعملوها في روحكم ـ في داعي للبهدلة والبشتنة دي.
المريخاب طقوا الكواريك عندما سجل فولمو هدفه في الدقيقة 72.
الجماعة في بكاء وجعريبة تلاتة يوم ، نحن نصبر ونرشرش ، ما خلينا ليهم حكمة عشان ما يطلعوا من حالة الحزن دا.
أول ما شوية كدا بدأوا يستوعبوا ورجعوا يأكلوا ويشربوا قاموا رفضوا الشكوى… قام تاني طقوا الكواريك.
قام تاني جاب سيرة البحر.
قلنا في شنو ؟
قالوا رفضوا الشكوى.
قعدنا تاني نصبر ونقول في الحكم ، يا جماعة ما كدا ، واصلوا دا حال الدنيا.
في داعي للكلام دا؟ ، وقت ما بتقدروا على الشغلة بتتفاصحوا مالكم؟
مريخابي قال لي حنمشي المحكمة الرياضية الدولية.
قلت ليه إن شاء الله تمشوا مجلس الأمن ، فما تفعلونه ما هو إلا تمديد لحالة البكاء وتشغيل لوضعية الكواريك.
شوفوا يا مريخاب هذا الجدول الذي نشر على الصفحة الرسمية لاتحاد كرة القدم السوداني على الفيس بوك يوضح موقف الهلال والمريخ من بطولة الدوري ويؤكد أن الهلال فاز بالدوري 19 مرة مقابل 11 مرة للمريخ خلال 30 عاماً .. هذه الألقاب حقق المريخ بعضها عن طريق شكاوى وبعضها تساهل فيها الهلال عندما انسحب الهلال من أجل الأمل من بطولة كان يتقدم فيها على المريخ في خواتيمها بسبع نقاط.
المريخ هذه الألقاب حقق بعضها بسبب خصم 6 نقاط من الهلال في فترة الكاردينال .. والمريخ مشى المحكمة الرياضية الدولية والمريخ جاب معتصم جعفر وأسامة عطا المنان ومحمد حلفا وسيف الكاملين وتحالف مع الأهلي مدني وأم مغد والفلاح وفي النهاية الهلال هو البطل وهو يتقدم على المريخ في الألقاب بما يقرب من الضعف.
حالتها دي بالمحكمة الرياضية.
تمشوا لوزان … تمشوا الدامر .. دار السلام .. نواكشوط .. كيغالي .. ترجعوا الخرطوم ، تدخلوا بفرصتين .. تشتكوا ، انظروا للجدول فهو يؤكد شيئاً واحداً ..تجروا جري الوحوش والمحصلة وصافة.
وحتى أثبت لكم إن المريخ لم يقصد من هذه الشكوى إلا التخدير ، هو أن المريخ طرح الشكوى على مواقع التواصل الاجتماعي وحاول أن يخلق قضية رأي عام ، وكان يمكن للمريخ أن يقدم شكواه دون الإعلان عنها إذا كان واثقاً من موقفه ، كما يفعل الهلال في كل شكاويه التي لا يعرف الإعلام عنها شيئاً وآخر شكوى قدمها الهلال ضد نهضة بركان أعلن الهلال عنها بعد ثلاثة أسابيع.
المريخ عاوز يعمل ضجة ويوهم جماهيره أنه مظلوم رغم أن لجان الاتحاد العام هي عبارة عن خلايا مريخية نائمة.
لكن تنوموا ..تصحوا .. تمشوا لوزان .. تغلبوا الفلاح ستة . تدخلوا بفرصتين .. تقدموا شكوى .. انظروا إلى الجدول ، فهو يوضح الفارق رغم كل الذي تقومون به إن كان في النور أو كان في الظلام.
