ماشيين وين؟
ماشيين نلعب في الدوري الموريتاني عشان البطولة الأفريقية؟
راجعين من وين؟
راجعين من الدوري الرواندي عشان البطولة الأفريقية.
معسكرين وين؟
معسكرين في مصر عشان البطولة الأفريقية.
سجلتوا منو؟
سجلنا 18 لاعباً أجنبياً عشان البطولة الأفريقية.
طلعتوا شنو؟
طلعنا خمس جنسيات عشان البطولة الأفريقية.
بتصرفوا من وين؟
بنصرف من مجلس نفطي ، جبناه مخصوص عشان البطولة الأفريقية.
عملتوا ايه؟
عملنا جهازين فنيين أجنبيين عشان البطولة الأفريقية .. فريق في كيغالي وفريق في الإسماعيلية… غير فريق الدخيري!!
والنتيجة شنو؟
خمس سنوات بيبنوا .. طلعوا بيبنوا في بيت جالوص.
لبسوا أحمر طلعوا من التمهيدي.
لبسوا أصفر طلعوا من التمهيدي.
لبسوا أسود طلعوا من التمهيدي.
لبسوا كريمي طلعوا من التمهيدي.
السنة دي قالوا يغيروا الأحمر والأصفر ويجربوا الاخضر.
عملوا تشكيلة جديدة أصفر بالبقع السوداء ، عاوزين يتنكروا عشان يخشوا المجموعات.
لعبتكم مكشوفة.
الجماعة ديل قاعدين موسم كامل في الدوري الموريتاني عشان البطولة الأفريقية .. وقاعدين موسمين في الدوري الرواندي عشان البطولة الأفريقية.
هاجروا برة البلد.
وبيلعبوا في الدوري السوداني وبفوزوا بيه بواسطة (الدخيري) عشان البطولة الأفريقية.
وفي النهاية بطلعوا من الدور التمهيدي.
ويقولوا ليك الحرب.
الصرف الذي صرفته الدولة في المريخ ، في الحرب ما صرفتو.
قراية المسا دي لا بتدخل طب ، لا بتدخل المجموعات.
لو عندكم (بصل) شوفوه.
