الناس ديل طبقوا شعار الثورة جملة وتفصيلًا.
حوريا ..سلام وعدالة!!!
في البطولة الأفريقية طاروا من (حوريا) في الدور التمهيدي.
قلنا ما مشكلة دي مرحلة (الحرية) طبيعي يطيروا من التمهيدي .. أصلهم اتعودوا على كدا.
الطيران من التمهيدي بقى عندهم (حرية) شخصية.
اقصد حوريا (مالكم عاوزين تلخبطوني)؟.
زمان عندنا صاحبنا كان يرفض يذاكر .. وكان وقت يسقط في الامتحان ، بقول لينا دي حرية شخصية.
ناس المريخ بعملوا في نفس الشيء.
بسقطوا في التمهيدي ، ويقولوا حرية شخصية.
أنتوا (حوريا) عندها علاقة بي (تهاني) المريخ ..وإلا الموضوع صدفة؟
قالوا أخوات بالرضاعة.
مرحلة السلام ما شايلنها…شغالين (بل بس).
والبل بكون في الميدان .. البل ما بكون في المكتب.
لكن الجماعة اتبلوا في الحالتين.
في الميدان وفي المكتب.
دخلنا على الدوري الممتاز .. قاموا طبقوا لينا شعار (العدالة).
لجنة المسابقات طعنهم في البداية رفضته.
مشوا لجنة الاستئنافات .. وعشان يأخدوا رأحتهم .. لجنة الاستئنافات قبلت استئنافهم… كشيء من (العدالة).
إلى أن تحققت (العدالة) بشكل تام عندما قامت لجنة الاستئنافات بإلغاء قرارها السابق واعتمدت طلب الفحص الذي تقدم به الهلال.
في عدالة أكتر من أن لجنة الاستئنافات لغت قرارها السابق.
قالوا ماشيين كاس.. والهلال في انتظار نصرًا خامسًا بإذن الله في هذه القضية.
انتصر الهلال في هذه القضية بعد أن رفض الاتحاد الأفريقي شكوى البوليس (السري).
اقصد البوليس (الكيني).
قول واحد.
ثم انتصر الهلال للمرة الثانية في الملعب بهدف فولمو.
رجعوا المكتب ..انتصر الهلال للمرة الثالثة بقرار لجنة المسابقات برفض شكوى المريخ.
مشوا المكتب تاني ـ لجنة الاستئنافات قبلت طعن المريخ.
عاد الهلال وانتصر للمرة الرابعة بعد قبول لجنة الاستئنافات طلب الفحص الذي تقدم به الهلال.
الهلال في الانتظار لتحقيق الانتصار الخامس في نفس القضية بقرار من المحكمة الرياضية الدولية.
قضية ينتصر الهلال فيها خمس مرات ميدانيًا ومكتبيًا.
في عدالة أكتر من كدا؟
وست سنين لا خبر لا جية.
المريخ ست سنوات .. صفر بطولات.
قدر ما ننسى هدف فولمو .. ونعتبر الحي أبقى من الميت، يرجعوا تاني يذكرونا بالهدف.
في داعي للبهدلة دي؟
أنتوا الموضوع دا وقت ما بتقدروا عليه بتفتحوه ليه؟
حاجات أنتوا ما قدرها .. ما تمشوا عليها.
