علم نفسك ماتكره وما لأنك قاعد في استوديو تفتكر لما تخون لعيبة وتنزع منهم شرف الإنتماء للوطن الفي الاستوديو ولا البره الاستوديو حيقولوا عليك زول كويس.
لا إنت ماكويس ياكابتن هيثم إنت مؤذي اذيتهم في مشاعرهم خلينا من الحق والقروش، ماهو إنت رغم السمك لبن تمر هندي المسميهو تحليل قاعد في ستوديو ومقعداك كورتنا الشينة دي.
مشاركات المنتخب والأندية السودانية في التنافس الافريقي، ده بس الوداك قنوات بي إن سبورت، ولو ماكورتنا المكعوجة دي واللعيبة المابستحقوا يلبسوا شعار المنتخب سيل شفت سيل مايجيبك ماش بجنب القناة.
وده ذاتو مجاملة منهم ساي، المنتخب غلب غينيا ودخل بتلاتة نقاط في حسبة أفضل التوالت للتأهل للمرحلة القادمة من بطولة أمم أفريقيا بعيداً عن لقاء بوركينافاسو.
بعد انتعشت الآمال بقوا وطنيين؟ ولو اتاهلوا حيكون الوطن ولا كيف؟.
إنت مجبر تعتذر ليهم ما أظنك تعتذر لأنك متوقع يخسروا من بوركينافاسو وده مابعيد عشان تشنقهم في الاستوديو.
هم هزموك ماهزموا غينيا، عارفين الكورة كانت شينة شديد، لكن غلبنا وده الكنا محتاجين ليهو عشان نقول شوف بلد واقعة وميتة ومكتولة ومدمرة لسه فيها نفس روح تلعب وتغلب ويكون عندها حظ ولو واحد في المية إنها تنافس علي التأهل.
غلبنا غينيا وفرحنا فرح شديد الماعارفو أنه نحن أسياد الرايحة الفتشوا خشم البقرة محتاجين فرحة صغيرة ولقيناها.
وإنت سيدا الرايحة ليهو غبينة يفشها في كورتنا اللي هو ركيزة من ركائز شناتا.
