مرة قاعدين في الدامر بنتسامر بي شعر عكير الدامر وبنشرب في الشاي ، (يا مولاى اه من قلبي اه من نارو حرقت قلبي)، وما قاصدين أي زول ، لا طبنجة ولا عوض زايد ، ما تلافحوا الكلام ساكت ، كنا بنردد في كلام ود الفراش (أنا شوك الكتر إن جرجروني.. أنا الجن البخلي الزول ينوني) ، وفي دي كنا قاصدين (جان).. فجأة كدا قالوا (جان) ظهر في بورتسودان ، قبل ما نقول دستور يا سادة ونقول (أفلج فاطرو زي برق السواري الكرن يتقسم مقاطع في المشي ويتحرن زي فرخ القطا الأماتو ركن وفرن) ، والباكات مجدعين في الواطة متل القنقر ، جان ظهر في الدامر . .طبنجة وعوض زايد ومصعب مكين وعلي جعفر النوم طار من عينهم.
ويا ريت لو بقت على طيران النوم ـ بعد أربعة روفا المدرب شوقي غريب طار ومحسن سيد كل اسبوع بطير ، والمدير الرياضي المصري طار وعلي جعفر مدير الكورة طار وهيثم كابو عضو المجلس طار والرئيس عمر النمير طار ، والمجلس كله طار… والمريخ ذاتو طار من التمهيدي باعتبار ما كان.
المريخاب اتهجموا لمن شافوا جان كلود في الدامر.. المساكين قلبهم طار واتبهدلوا في الدنيا دي جنس بهدلة.. البقول ليك مسيرة والبقول ليك ميج والبقول ليك صاقعة وقعت من السماء.
ما عارفين جاتهم من وين؟
هسه ناس صن داونز صدقوا ، وناموا قفا ، قالوا جان موقوف ، قام الجنا الزي العفريت دا ظهر ليهم في بريتوريا.
الموضوع جاب ليه بريتوريا.
الموضوع كبر اوي.
الزول دا فعلا (جان) بعد ما ربطوه ووقفوه ظهر ليهم تاني.
يا طبنجة لقيت ليك عذر . .. (الجان) دا الاتحاد الأفريقي ما وقفو عاوز توقفو انت؟
اكربوا بطنكم ساكت وابقوا مارقين ، أحسن ليكم تتخارجوا من بدري من الدامر.
اتخارجوا من الدامر ومن كجيالي ، أحسن ليكم.. التمانيات دي ما بتقدروا عليها.
