بشوفك مرة زي زولين
مرة بتبقى (حاج الزين)
ومرة بتبقى يا (تامر)!
أشوفك مرة بالسبحة ومرة تكون على (Live) بتتكلم عن الرجيم!.
تنافق يوم وتصدق يوم
وزي حال البلد والناس:
تخش (أحمد)
وتطلع (هاني ود مسعود)!
يقع (دقلو)
يقوم (برهان)
وبتكلم كمان في الدين
زي المنشار بيأكل من موائد السلطة أياً كان
يصدق جاز.
ينقب في الدهب بالدس
يتاجر في القلوب وألماس
نشوفك مرة في التلفزيون بتتحدث عن الأخلاق وعن الأوطان.
نصفق ليك مع إنو الجميع عارفين بتأكل في حقوق الناس!.
وما قادرين يقولوا البغلة في الإبريق
تقيف (عباس)
وتقعد (رامي ود مجذوب)!
وفي مرات تكون (عثمان) وفجأة ألقاك بقيت (ريان)!
وقت نسأل عن الحاصل يقولوا لينا: دا الـ (FaceApp)!
دا حال الناس.
حاج التوم خطب بالذكاء الاصطناعي
وعقد بالذكاء الاصطناعي
وطلق بالذكاء الاصطناعي وعمل لزوجتو (Block)!
ولمن مات دفنا (Trend)!
وزواج الخير
وموت (كلتوم)
وسفر (إيمان).
وحتى الحب وناس البيت كلو صبح عُقب (تطبيق)!
تحمل (حب) تحمل (شوق)
تنزل (وش) تدلت (وش)
وتتغير مع الأيام.
نبرمج فيك يسار ويمين
فهمنا غريب
بنتغالط على القبلة
ونتكاتل بحد السيف
تعريجة :
في واحد قال لي: لو مصر شالت كأس العالم المريخ بتجاوز مرحلة التمهيدي؟!
الجماعة عملوا تهنئة للسيسي
جنس (كسير تلج)!!
إن شاء الله السيسي يوصلكم المجموعات.
تقولوا (بل بس) وتقدموا في (التهاني)
