موعدنا يا صاحب صباح

حاجات هناك

ما بتتلقي في أي عالم

غير هناك..

لمّة سحاب من قبلي جاب

ريحة المطر،

نيمنا الظليل ساعة مقيل،

والقعدة في ضل الصريف،

ضحكة وريف،

وصديق حميم..

يغمر صباحاتك رضا

ألطف من الندى

والنسيم.

دي حاجات هناك

ما بتتلقي في أي عالم

غير هناك.

لمّة صحاب، والقعدة حوش،

العضّة بوش، طيبة النفوس

الما بتكوس غير ضحكة القلب الولوف،

الألفة بين الناس تطوف،

واللمّة في كل الظروف.

وحاجات هناك

ما بتتلقي

في أي عالم غير هناك.

رد الجميل للبحفظوك لمن تغيب،

سمة الوضوح،

رفض الجنوح

للعيبة والفعل المريب.

ما بتتلفت لمن تضيق،

تلقى الرفيق، إيد الحبيب،

الفيهو ظنّك ما بخيب،

الطيبة والطعم الحليب.

وحاجات هناك

ما بتتلقي

في أي عالم غير هناك.

…

رد السلام، الاحتشام، الابتسام،

النخوة والعُشرة التمام،

جيرة البكون في الحوبة أكتر من أخوك.

في بلدنا ديك، كل الكبير محسوب أبوك،

من غير تعد، الناس أهل،

في الحارة هم البلحقوك.

وقيم هناك

ما بتتلقي

في أي عالم غير هناك.

إيد التمد، من غير تعد،

في الوقعة والنايبات تسد.

قولة أرح، تبراك Hلوف،

ناقص يتم همه وعمل،

شيل في الكتوف.

قول يا بلد، قول يا بلد،

أو نادي يا بت، يا ولد،

بقضي الغرض،

حتماً وأكيد

يقضي الغرض.

موعدنا يا صاحب صباح،

ننهض، نقوم،

نسمو فوق كل الجراح،

ويلمّنا الوطن البراح،

بحب هناك ما بتلقي

في أي عالم غير هناك.