ديون رئيس نادي الهلال ونائبه وديون أعضاء مجلس الإدارة، دي كلها ديون هالكة مابتتسجل.
دين يتسجل في بند التبرعات، لأنه باختصار ماف زول بدفع (دين لي نفسو).
إنت لما جيت واستلمت إدارة النادي دخلت من بوابة (دعم النادي) مش من باب ( دائن النادي)، وبالتالي أي قرش يتم دفعه منك أو اعضاء المجلس يدخل في بند (التبرعات).
إنت فشلت في تطور النادي مالياً ويكون عندو موارد ودخل، يبقى الصرف يكون حسب الوضع المالي للنادي، في حدود ضيقة، في التسجيلات والإقامة.
إلغاء السفر والمعسكرات حسب الوضع المالي للنادي، يا إما تدفع من جيبك زي مابتقول وتصرف في بنود فوق إمكانية النادي وتجي تقول (أنا دفع قروش دين للنادي).
الفريق يعسكر في فندق داخل السودان، فندق السفير، فندق مروي في السوق العربي، ده واقعك المالي، دفعت من جيبك طوالي يدخل في بند ( التبرعات).
إنت في كرسي المسؤول مابتدين نفسك وتقول ادفعوا لي، ده تضارب مصالح أكيد عندو هدف، وده بخلينا نسأل الأموال البتم دفعها على أنها ديون هل مرت بالقنوات المالية الطبيعية، يعني دخلت حساب النادي في البنك دخلت بمستند مالي وطلعت بمستند مالي، ولا كلام شفهي اتسجل ارقام في بند التبرعات لأنه زي ماقلنا ماف دين ولا في جهة جابت رئيس النادي أو نائبه لردم النادي بالديون؟
الميزانية يفترض يتفتح في تحقيق وتخضع للمراجعة العامة.. 39 مليون دولار ديون السوباط والعليقي على الهلال مقابل شنو؟ أكيد ماحب الهلال.
