عندما ندخل للتنافس ويبدأ الموسم الرياضي، ويلعب الهلال مباراة وإن كانت ودية نعيش في حالة من الضغط والتوتر والترقب، ندخل ونمرق، ونقيف في الباب، ندخل الفيس ونطلع من الواتس ونعاين في الساعة.. ونبقى زي الزول الرايحة منو حاجة.
بنكون في حالة من الشد والنقاش الداخلي الحاد، بنتغالط مع روحنا.
وعندما ينتهي الموسم ونكون في فترة الراحة السلبية بنعيش في ضغط أكبر بدون الهلال ومبارياته، الحياة بتمسخ علينا، وبنبقى زي الناس الما عندها موضوع.
إذا كانت رؤية الهلال عيداً فإن لهلالنا هذه القدرة على منح الفرح.
الأكيد أن مباريات الهلال عندنا مناسبات سعيدة، زي العرس حتى لو عشنا في حالة من التوتر الشديد.
يوم المباراة بنجدد خلايانا، وننعش روحنا، وتبقى لينا سيرة الهلال ونسة بنعيد بيها.
بنتكلم عن التشكيلة، من الذي سوف يشارك؟ وكيف سوف يفكر المدرب؟ تبديلاته بتبقى لينا نقاش، نساهر فيها الليل كله.
وقبل ذلك ـ التحرك لملعب المباراة وصور اللاعبين، والتسخينة أي حاجة عندها علاقة بالهلال حاجة حلوة.
الهلال لابس شنو؟
من الذي سوف يسجل الهدف الأول؟ وبكم هدف سوف ينتصر الهلال اليوم إن شاء الله؟
ح نقعد نعيد في الأهداف مثل أغاني وردي.. أي حركة حتى لو كانت عادية ممكن نعمل منها (فيلم هندي).
شوقنا بحر.
وأرقام اللعيبة… والضربات الركنية.
نحن أي حاجة من الهلال ولو كانت بسيطة بتسعدنا ـ لو “جدعة تماس” عندنا بالدنيا.
اليوم باسم الله سوف يبدأ الهلال أول مبارياته في الموسم في بطولة سيكافا أمام توسكر الكيني.
على بركة الله نبدأ.
بالتوفيق لهلال الملايين ..موسم يفوز فيه الهلال بإذن الله بكل البطولات التى يشارك فيها.
كورتنا زي قهوتنا “سكر زيادة” أمام توسكر الكيني.
توسكر ما توسكر ..عندما يلعب الهلال بتكون في “لفة رأس”.
المريخاب الليلة ح يركزوا مع “كانتي” أكتر من تركيزهم في 38 لاعباً مع بعثة المريخ في كيغالي.
مدرب المريخ صدق نفسو .. قالوا قال المريخ حقق الدوري بي جدارة!!
طيب لو داركو للطيران بقول كدا ـ الدخيري يقول شنو؟
عندهم 38 لاعباً في كيغالي وبيلعبوا بالدخيري.
والدخيري ذاتو ما بحلكم.
انتوا الدوري يتعرفوا ليه شنو؟ غير “زيكو” جوة البلد و”كابو” برة البلد.
