المريخاب السنة كلها شغالين فولمو قاصر.. فولمو قاصر … عملوها نغمة موبايل. أول مباراة قمة جمعت بين الهلال والمريخ في الدوري السوداني هذا “القاصر” سجل هدف في المريخ ..في قمة “المسمار”.. ودي غير قمة “حنة الدامر”.
شفنا جنس بكا بعد هذا المسمار.
طقوا الكواريك وجروا على “الدخيري”.
تنجدنا وتلحقنا.
فولمو جابوه “قاصر” طلع “ساحر”.
يا متعلمين يا بتوع المكاتب دي سحر ولا ما سحر؟
فكوا القاصر ومسكوا في الجنسية.
مدافع الهلال البوركيني “سانوغو” قالوا برضو ناس الهلال جابوه “قاصر”.
قام حصل شنو؟
قام طلع هو الآخر “ساحر”.
الفهم شنو؟
من قاصر لي قاصر.
من قاصر لي ساحر.
ناس الهلال لقوا الحكاية ماشة معاهم باسطة.
تتخيلوا عملوا شنو؟
جابوا ليهم قاصر ثالث… قاصر سوف يتم تسجيله في كشوفات الهلال يوم 15 سبتمبر القادم بعد أن يكمل الـ18 عاماً.
بيربوا فيه ..منتظرينو يصل للسن القانونية.
أها يا متعلمين يا بتوع المكاتب دا سحر ولا ما سحر؟
قودوين دا كمان سحرو براهو.
ناس قالوا دا “سيدا’ .. وناس قالوا دا “روفا”.. وفي ناس قالوا لا سيدا ولا روفا … دا فهمو براهو.
في ناس قالوا خلطة بين سيدا وروفا ، شال من سيدا الهمسة ومن روفا اللمسة.
متل الطالب البقرأ طب بالصباح وبقرأ معهد الموسيقى والمسرح بالمساء.
يجيبوه قاصر ويطلع ساحر.
الكلام دا من زمن قابيتو وأكرم الصلوي.
نحن أي حاجة عندنا بنظام.
يا متعلمين يا بتوع المكاتب .. الدخيري ما بحلكم.
قودوين قالوا بيروب الموية .. وبطلّع من المنديل حمامة.
وبطلع من الطاقية جوز أرانب.
ومن جيبو مكوة فحم!!
مكوة فحم دي جديدة علينا.
حاوي عديل كدا.
زول صعب.
زول شفت.
زول ساحر.
إذا فولمو هو “القيصر” فإن قودوين هو “الحاوي”.
أها الكلام دا كيف معاك يا علي عصام؟
في “باك” قال شوف عينو … في “كديسة” مرقت من كدارتو.
وفي حارس مرمى قال شاف ليه “أسد” طالع من شعرو.
وفي ناس قالوا “فيل” ما “أسد”.
ناس اللجنة الشعبية في الحي ختوا أيديهم في رأسهم.
والتومة بنت عسلية قالت المروحة بقت تتكلم براها.
يا متعلمين يا بتوع المكاتب دا سحر ولا ما سحر؟
عندي ليكم اقتراح ـ مباراة القمة القادمة خلوا الدخيري يقيف ليكم حارس مرمى.
وجيبوا شرطة النجدة.
وشرطة المطافي.
وشرطة العمليات.
الشغل دا كبير ، ما بتقدروا عليه .. يمكن يحصل شغب.
باقي نحن وقت نقوم كعبين.
وكان قمنا ما بنقعد.
ولو قعدنا بنقعد فوق رأي.
