كذبة دولارات المري
ماعارف لمتين ح نظل عايشين وهم النشاط الرياضي المزيف، واضح إنه القصة دي بقت في الجينات الرياضية، ماف كورة، في حرب، في دمار بلد كامل، البلد انتهت بالمعنى الحرفي للكلمة.
خلينا نطلع من مسار الجينات الرياضية اللي هي تربية نظام فاسد ( المؤتمر الوطني)، حول الرياضة لاداة من أدوات الالهاء، بخلق قصص كاتبها وكاتبها بمعرفة او غباء من يروج لها خلال اكثر من 30 عاما.
والنتيجة ماف نشاط حقيقي، ماف نظام رياضي، ماف مؤسسات رياضية، ماف اتحاد كورة، ماف أندية بالمعنى المعروف في كل الدنيا، مش لانه ماقادرين،أو مابنعرف، لا، مقصود، وبعض المغشوشين خلينا نقول، بروجو لنشاط افتراضي، مامتوفر ليهو اي شيء.
لاحظ حاليا بتم الترويج لبطولة باطلة قانونيا، سماها الاتحاد النخبة، تفاهتها أندية زي هلال مريخ او حتى بقية الأندية، جمعت ليها المتاح من اللاعبين،والعايز يجي يشارك يشارك والمعايز يجي ممكن مايجي، ليه؟ لأنها بطولة انتحارية في أجواء مضطربة امنيا، والنظام بالمناسبة كله احترافي عشان مايقول ليك الأجانب فقط هم الرافضين، حتى اللاعب الوطني ممكن يرفض المشاركة لذات الأسباب وممكن يفسخ عقدو ، ويلعب في اي دوري تاني لذات الأسباب.
ومن طرائف النشاط الافتراضي المزيف البتم الترويج ليهو كانه في شيء حقيقي حاصل، اتجاه داخل نادي الهلال لتحويل فريق كرة القدم إلى شركة لوفهمت الخبر صاح، وفي ناس زعلانين هل ناقشواتحويل فريق الكورة لشركة في اجتماع مجلس الادارةولا ماناقشوا؟ وهي فكرة ماقايمة علي اي شيء نعتبرها ونسة بس لا اكتر ولا اقل، طبعا الفكرة اتراجعت من تحويل النادي إلى شركة بمحاولة استهبال والتفاف سموها من شروط انه عشان تكون نادي محترف لازم النادي يتحول لشركة وطبعا قلنا وقتها ده كلام فارغ وماف حاجة اسمها نادي محترف في حاجة اسمها الرخصة وماف في شروط الرخصة النادي يتحول لشركة م، ودي كلها اطماع الراسمالية الطفيلية مدعومة من نظام سياسي فاسد، اللي مابتخضع لأي معايير اقتصادية مالية ولامعروف مصادر اموالها عشان تراقبها وتقدر تحاسبها، ولامفهوم تحت نظام اقتصادي وهل نحن فاهمين نحن اقتصادنا ده نسمي شنو؟.
الموضوع طويل وعايز مساحات لكن المختصر انه مستحيل يتم.
ونواصل مع كذبة يتم الترويج ليها اسمها أموال من الاتحاد الافريقي يحق لمجلس المريخ الحالى المريخ الحصول عليها.
