متابعة سلسلة أساطيرنا الشعبية السودانية، ارتبطت الأساطير بكثير من قصص الحيوانات و الطيور و منها حكت الراوية السيدة فتحية عثمان جادين محمد من ود راوة (مدينة في السودان تقع على الضفة الشرقية للنيل الأزرق في ولاية الجزيرة، وتبعد حوالي 80 كم من مدينة الخرطوم) من قبل اسطورة (طير ام رخيٌم) و عن قصة:” الطير الخُداري”:
الاسطورة كما سردتها السيدة فتحية عثمان جادين:” الطير الخداري:
” كان في مرا عاقر (لا تنجب) ذهبت لراجل يعالجه واداها علاج قال ليها تجيبي جِرو ( جنا الكلب الصغير) و تطبخية دمعة (طاجن أو يخني) و تاكليه، و لزوجك ديك ياكله و كل واحد براهو في حلة، و بعد طبخت غطت الحلتين و طلعت، جا رجاله بوراها واكل من الحلة الفيها الجرو، و لما جات المرا سألته:” انت اكلته؟”، رد قال ليها :”اي أكلته قالت ليه:” من ياته؟”، قال ليها :” من الحلة دي” ، و أشر على الحلة قالت ليهو:” هي واااي دي الموصفِنها لي ما الموصفِنها ليك خلاص انت كان كدي بتحمل”، يللا الراجل عدى ليهو ذي شهرين تلاتة و ظهر عليه أعراض وٓحم الحِمل لحدي ما بطنه كبرت
و تم التسعة شهور يللا اليوم دا بطنه وجعته شال ليه موس و توب و طلع بيها الخلا مشى لقى ليهو شدرة سٓممٌِحة
و ضليلة قعد تحتها و بطنه واجعاه قعد يدعِي يا ربي:” السويتو لي في بطني سوي لي في وركي؟”، وركه اتورم،
و تاني قعد اقول:” يا ربي السويتو لي في وركي تسوي لي في ساقي؟”، يللا ساقه اتورم و تاني اقول :”يا ربي السويتو لي في ساقي تسوي لي في راحة ( بطُن ) كُراعي؟”، يللا كراعه شالت اتنفخت كبيرة يللا شال الموس و فتح راحة كراعو طلعت بت حلااته، يللا مسكه نضفه و لفاها بالتوب، يللا قام عاين في الشدرة شاف ليه عِش فووق ل(لطير الخداري) قام شال البت ختاها في العش و دمدمة و خته ليها التوب تحته وقام نزل و ربط كراعو و فات. و جا الطير الخداري لقى البت في عٍشة و بقى يجيب الموية و يشربه في خٓشُمه (فمها) و يجيب الأكل و يأكله في خشمه و شوية شوية لما البت كبرت و بقت جميلة و جا ود النمير راكب حصانه و شايل سيفه و عبيده ماشين بوراهو لقى الضُل سممح قعد تحته و رفع عينه شاف البت قاعدة فوق العش سممحة قال سأله:” انت بت منو؟”، قالت ليه :”أنا بت الطير الخداري”، قال ليها:”ابوك وينو؟ “، قالت ليه:” بجي بعد شوية”، بعد شوية جا الطير الخداري وقال ليه ود النميري:”أنا عاوز اتزوج بتك دي؟”، طوالي الطير الخداري اداها ليه ، قام ود النمير ساقه معاه في الحصان و. دخل اهله وقال ليهم:” البت دي أنا داير اتزوجه”، قام سافر ود النمير ليجهز حاجات العِرس، ولكن أمه وأخواته السبعة قالوا :” لو عرسها ود النمير تاني ما بيشتغل بينا “، و اجتمعوا و اتفقوا يقولوا ليه:” امك ماتت”، و بقو إسمحو و اجيهو ليه في أمه و ليقولوا ليهو دي العروس، و قاموا حبسوا بت الطير الخداري في جزيرة.
و جا ود النمير و عرس أمه و هو ما عارفه انها أمه ، قامت أمه بعد فترة قالت إنها حامل و نفسها في تٓمكة ( بطيخة) قام ود النمير أمر واحد من عبيده و قال ليه:” امشي لست الجزيرة و جيب لينا منها تمكة؟ “، قام العبد مشى و بقى ينادي و يقول:
ـ ست الجزيرة النية.
تماسيحك و عواسيلك حٓمنِي الجيٌة
مرت ود النميري حامل دايرة ليها تمكة”.
قامت ردت عليه و قالت:
“امي أتمنت بيٌا و أبوي حمل بيٌا
و الطير الخداري عشعش بيٌا
ود النميري العرس أمه شِن بجيب ليٌا؟
طير يا مقص اقطع لسان العبد”.
قام طار المقص من جنبها و قطع لسانه و رجع العبد دمه سايل و يلغلغ:” لغ لغ “، قام ود النمير قطع ليه رأسه بالسيف
و رسل ليها عبد تاني وكل مرة نفس الشيء قام قال بالطريقة دي حا يكملوا عبيدي كلهم اخير امشي براهو
و نادى:
” ست الجزيرة النية.
تماسيحك و عواسيلك حٓمنِي الجيٌة
مرت ود النميري حامل دايرة ليها تمكة”.
قامت ردت عليه و قالت:
” امي أتمنت بيٌا و أبوي حمل بيٌا
و الطير الخداري عشعش بيٌا
ود النميري العرس أمه شِن بجيب ليٌا؟
طير يا مقص اقطع لسان العبد”.
قام طار المقص و إتلقاهو ود النمير بسيفه و قام فات مشى البيت و بنى ليه كُرنُك( قطية مبنية من القش لحفظ الغلال) كبييير دخل فيه أمه و اخواتي و قال ليهم انسجوا لي فردة ( توب من نسيج القطن بالنول اليدوي اشتهر بصناعتها أهل شندي) و بقن انفشن في القطن و انسجوا بالخيط لعمل الفردة و لما قربوا أكملوا عملها نادى عبد و قال له:” كُب جاز في الكرنك و اشخت فيه الكبريتية”، و ولعت النار و حرقت أمه و اخواته بداخله، و مشى جاب بت الطير الخداري
و عرسه”.
خلاصة الاسطورة:
يبدو أن الاسطورة قديمة منذ زمن العبيد و السخرة، و ايضا تتضمن الصراع الأزلي بين زوجة الابن و النسبية (ام الزوج)
و بناتها و المشكلة في أنهن يرين انهن أحق به و بحقه منها؟
و ما يترتب على تصرفاتهم من رد فعل احيانا قاسي من الابن.
الطير الخداري صاحب الاسطورة:
اسمه الرول، الشقراق، شقراق حبشي، الاسم العلمي (Coracias abyssinic) و بالانجليزي(Abyssinian roller)، و هو طائر صغير الحجم لونه ازرق لامع يميل للاخضر و لون ظهره بني، يتغذى على الحشرات الطائرة
و الزاحفة، طائر يألف الانسان.
و قد ألهم الطير الخداري عدد من الشعراء ليحكوا له شكواهم
من محبوباتهم منهم تغنى له:
ـ الفنان صديق عباس و الذي عمل معلماً في قرى غرب كردفان و قد تغنى للشاعر محمد عبد الله أبكر أغنية:” اجمل الحواري”، منها:
إتلموا يا كباري. و شاورو الرمالي
يشوف الخيرة مالي إتحيرت أفكاري.
فى أجمل الحواري
يا طير يا خدارى. يا ألبي العلي دارى
سلم علي البريدو. فوق الحلة جاري
ـ الشاعر ﺍﺳﺤﻖ ﺍﻟﺤﻠﻨﻘﻲ بقصيدة :”ﺍﻟﻄﻴﺮ ﺍﻟﺨﺪﺍﺭﻱ” التي تغنى بها الفنان ابراهيم اللحو:
ﻗﻮﻝ ﻟﻴﻪ ﻳﺎﺍﻟﻄﻴﺮ ﺍﻟﺨﺪﺍﺭﻱ. ﻗﻮﻝ ﻟﻴﻪ ﻭﺣﻴﺎة ﺣﺒﻨﺎ
ﻭﻳﻦ ﺭﺳﺎﻳﻠﻚ ﻳﺎ ﺣﻠﻴﻼ ﻭﻳﻦ ﻋﻴﻮﻧﻚ ﻣﻨﻨﺎ
ويستمر يخاطبه حتي يشكو له من الفراق:
ﺳﺎﺏ ﺩﻳﺎﺭﻧﺎ ﻭ ﻓﺎﺗﻨﺎ ﻳﺎ ﻃﻴﺮ. ﻣﺎﻟﻮ ﻓﺎﺕ ﺃﻫﻠﻮ ﻭ ﺩﻳﺎﺭﻭ
ﻭ ﺍﻟﻔﺮﺍﻕ ﺑﺘﻘﻮﻝ ﻋﻴﻮﻧﻮ ﻗﺴﻤﺔ ﻣﺎ ﻛﺎﻥ باﺧﺘﻴﺎﺭﻭ
ﻳﻼ ﻟﺘﻮﺗﻴﻞ ﻧﺰﻭﺭﺍ ﻭ ﺍﻟﺠﺒﻞ ﻧﻌﺴﺎﻥ ﺧﺪﺍﺭﻭ
يظهر طير الخداري يشرب من نبع جبل توتيل بكسلا.
ـ عواسيلك: سحاحيرك (جمع سحار).
الكُرنك:
و الجمع كرانِك هي مخازن تقليدية في منطقة الجزيرة
و البطانة، و هي قطية مبنية كلها من القش تستخدم لتخزين البصل الذي يوضع على أرضها على( السٓاداب) في وسطها ( فرشة على الارض من نبات( الدهاسيٌِر) و هو نبات طويل له اطول من نبات السوريٌب و له فروع أشبه بفروع نبات الحِنة).
* “سلسلة أساطيرنا الشعبية السودانية، (كتاب غير منشور)، لسلوى عبد المجيد أحمد المشلي 2024.
