إذا حلّلنا أهداف الهلال الثلاثة في مرمى الجيش الرواندي، الهدف الأول كان خطأً واضحاً من حارس المريخ البوركيني لادجي إبراهيما سانو.
لادجي عيشتو تطير.. لادجي يعمل شنو؟
ح تقولوا لي الزول دا ما عندهُ ذنب، لأنّ المدافع مفروض يضغط على روفا.
بعدين بعد الهدف الذي سجّله روفا في المريخ من منتصف الملعب، مفروض ناس المريخ تاني ما يتكلموا، وأي هدف يسجله روفا، إن شاء الله في فريق روسي، مسؤوليته تقع على حارس المريخ.
هسع في داعي للإحراج دا؟
الهدف الثاني هدف (العمل الخاص)، للأمانة الهدف دا قسمة ونصيب، عشان صنداي رغم الخطأ الذي وقع فيه المدافع كان لاجتهاد صنداي وتوقعه، أو للقسمة والنصيب دورٌ فيه…لأن التوقع (قسمة) ، والنصيب (إجتهاد).
دا ناس المريخ مرقوا منو؟
سمعتوا بي طرفة محمد موسى (مرقنبو قرنبو)، هدف صنداي يُجسِّد هذه المقولة، الحارس (مرقنبو)، والمدافع أعاد كرة قصيرة للحارس (قرنبو)، برضو فهم، بالمناسبة هذا الهدف من أصعب الأهداف التي أشاهدها، رغم أنّ صنداي كان في حالة انفراد تام بالمرمى، لكن توقُّـع صنداي يؤكد أنه مهاجمٌ سوبرٌ، أما عبقريته فتظهر في أنّـه سدّد في زاوية صعبة وبهدوءٍ شديدٍ، بعد أن أغلق حارس الجيش المرمى.
الشئ البعمل فيه (المهاجم السوبر) دا شنو؟
السوبر دا بقي في أي مباراة يسجل ويصنع.
بالطريقة دي ح يعمل لينا أزمة في (الباكات).
الهدف الثالث كان خطأٌ كارثيٌّ من (طبنجة)، أصلاً جان كلود دا أي (باك) يقابله بعمل فيه ما فعله في (طبنجة)، لذلك الخطأ يرجع إلى طبنجة لأنه خرب طبع جان كلود.
لذلك، نحنُ وشلاقة مننا كدا، قرّرنا ندفن في ملعب KMC بدار السلام، أما العزاء فسيكون في الرد كاسل.
ندفن الجيش الراوندي ونعزي المريخ السوداني.
ما تقولوا لي ناس الرد كاسل ذنبهم شنو؟
الناس ديل بدخِّلوا نفسهم براهم في حِـتّـات بايخة.
تعادل الهلال مع مقديشو سيتي، قالوا الهلال يُوجِّـه إنذاراً لأندية دوري أبطال أفريقيا!
تعادل الهلال مع الأهلي مدني، قالوا الهلال ينجح في عرقلة الأهلي مدني!
فاز الهلال على كتور جوبا، قالوا مقديشو سيتي وصل الفيفا!
هسع بعد فوز الهلال على الجيش الرواندي ما عارفهم قالوا شنو؟
الشئ الجاني قالوا عنابر الحوادث في كل المستشفيات امتلأت بضحايا روفا.
والله نحن لو عارفين كأس المجاعة دا بعمل كدا، كان حسمنا المواضيع دي من أول مباراة.
نحن لو عارفين كأس المجاعة حلو كدا، كنا كل سنة بنشيلو ـ عشان كدا جمال الوالي كان كل خميس بنظم ليه (سيكافا).
نحن حالفين كأس سجائر تاني ما نخليه.
ننوِّه السادة المسافرين أنّ الهلال عندما يلعب نهائي سيكافا سوف يكون المريخ خاض أولى مبارياته الإعدادية.
الموضوع دا عاوز (صَـابِنَّـها) فترقّـبوه.
