ما عاوز أقول أي حاجة، ولا عاوز أعلق، يوم الجمعة عندنا مباراة فاصلة مع البوليس. (وخشمي وعندي).
ما عاوز أجيب سيرة (طبنجة) والفريق الليبي (العسكري) و(حفتر).. (وخشمي وعندي).
ولا عاوز اتكلم عن فريق فيه (13) لاعباً أجنبياً وجهاز فني أجنبي وثلاثة مديري كرة، ومجلس إدارة نفطي، وبيلعب مع فريق هواة، (وخشمي وعندي).
وموضوع روفا والدامر والأربعة، أنا ذاتي نسيتو، هو كان حاصل شنو في الدامر؟ (وخشمي وعندي).
ولا عاوز أقول ناس المريخ قالوا عاوزين يُحوِّلوا الهلال للكونفدرالية، وهم طلعوا من (التمهيدي الأول)، وكان للتمهيدي ما عاوز أجيب سيرته من الأساس، (وخشمي وعندي).
يعني شنو لو طلعوا في هذه الظروف من التمهيدي الأول.
ما ح أقول إنّ الهلال أصبح كلما واجه المريخ، أجبر المريخ على تغيير الجهاز الفني ومجلس إدارته.
ولا عاوز أقول ليكم إذا كان الهلال سوف يواجه في بنغازي المريخ، أحسن من هسه يشوف ليه مجلس إدارة جديد، الهلال من الشوط الأول ممكن يحسم ترحيل داركو للطيران من بنغازي ورحيل مجاهد سهل من المريخ سيحسمه في الشوط الثاني (وخشمي وعندي).
مباريات القمة زمان كانت بتشيل الباك، تشيل حارس المرمى ، تشيل المهاجم، تشيل المدرب، لكن مباراة قمة تشيل مجلس الإدارة كله، هذا لم يحدث إلا في زمن الغربال وروفا وجان كلود.
لن أتحدّث عن فلمو عشان الكلام كتر عليكم، ولا ح أجيب ليكم سيرة العضوية الشرفية الإلكترونية للهلال، (وخشمي وعندي).
لكن بصراحة وجود الهلال في قائمة تضم أفضل (10) أندية في أفريقيا لسنة 2025م في قائمة تخلو من الأهلي المصري والترجي التونسي، مع ظروف السودان وحربه، حاجة ما بقدر أسكت عليها.
ولا بنجامل في حاجة زي دي ولا بنسكت عليها.
إنتوا يا ناس المريخ بتبنوا في شنو؟ والبلد كلها ادمرت إلا الهلال.
فتّشت اسم المريخ في قائمة الأفضل، وجدته في قائمة قسم (البنايات)، قالوا قاعدين يبنوا.. فريق طلع من دور الـ64 وفريق موجود ضمن أفضل (10) أندية في أفريقيا (وخشمي وعندي).
لو عاوزين تبنوا أبدوا أحسن من (المزيرة)، الصالون ما بتقدروا عليه، والباب أعملوه ضلفة واحدة، ضلفتين لي شنو وإنتوا بتطلعوا من التمهيدي الأول..؟ و(خشمي وعندي).
