الموقف المخزي والجبان في حرب الدمار الشامل للسودان وحياة السودانيين هو موقف الرياضيين، وتحديداً أصحاب المنصات والمواقع الإلكترونية والصفحات الشخصية عبر السوشيال ولا استثني إداريين في أندية استمتعوا بامتيازات حرب زادت ثرواتهم في المتاجرة بأزمة الحرب وانعكست سلبا على المواطن في حياته اليومية.
وهؤلاء سافرد لهم مساحة لاحقة الجميع يهرب من الإشارة للحرب ودمارها وتدمير الواقع الرياضي.
لماذا؟ السؤال، الاجابة : ماعاوزين سياسية في الرياضة، وين السياسة انت جبان بس لمصلحة أو لخوف، أنت مضر وأنت بتنقل واقع مزيف لنشاط معدوم وبتختزله في ناديين، والناديين نفسهم أو ادارتهم مع الاتحاد على همهم الحفاظ مصالحهم وتقاطعاتهم المشتركة أكتر من مواجهة الحقيقة.
الشجاعة إنك تقول الاتحاد ماقادر يعمل نشاط حقيقي ودوري بسبب الحرب، كيف بسبب الحرب؟ الإجابة لأنه الناديين رافضين نشاط داخل السودان، ليه رافضين؟ لأنه الوضع الأمني مخيف، وده بتجربة منافسة زي فاسدة (النخبة) اتلعبت بدون المحترفين أو غالبيتهم لأنهم رافضين اللعب وفيهم الوقف وفيهم الهدد بفسخ التعاقد وفيهم الفسخ العقد، وين السياسة هنا؟ قول ده وانقله وحللوا بدل ماتنقل في تفاهات سجل وشطب وده مفروض يواصل وده مفروض يمرق.
الاتحاد جبان ضيع بقية الأندية وضيع حاجة أسمها كورة في السودان لأنه إدارة الناديين عملوا تعاقدات مع كم كبير من اللاعبين ومدربين أجانب وخايفة يفسخوا عقوداتهم، وين السياسة هنا؟ الهلال مشارك في الأبطال بدون دوري وبقية الأندية في المنافسة الأفريقية دورياتها شغالة والهلال يتسول مع المريخ المشاركة في دوريات خارجية ومالاقين وتم طردهم واهينوا من كم دوري، الإهانة والمرمطة سببها الحرب، وين السياسة هنا؟.
الفريقين بره السودان زيارات ياخ الواقع هزلي لدرجة أنه ماف اجتماعات إدارة بتم السودان مابجوا وده سببه الحرب وين السياسة هنا؟ وقول سياسة أنت شغال شنو مش صحفي أو صاحب منصة أو صفحة ورياضي بدس الحقيقة وبتنقل للناس واقع مزيف ليه ؟ ماف اجبن من كده الحاصل في الرياضة مابنفصل عن واقع البلد.
وطبعاً دي تربية خايبة وقديمة أنك تفصل واقع سياسي مؤذي عبر التاريخ القديم متدخل في أهلية وديمقراطية الحركة الرياضية المكسب التاريخي للحركة الرياضية وتقول ده سياسة ممنوع نشره أو الكتابة عنه فأنت غير إنك جبان وموقفك مخزي أنت جزء أصيل كإعلام أو منصات مختلفة في بيع الوهم للجمهور اللي اثبت واعي ومستوعب أكتر منك ومتجاوز وعارف انك بتبيع ليهو مخدر ما أكتر.
