لاعب الهلال القيصر إيمانويل فلمو (الذكاء الاصطناعي)، يبدو أنه هو أول لاعب أجنبي ينال عضوية الهلال أو هو على الأقل أول محترف أجنبي يعلن عن ذلك، فقد أعلن الذكاء الاصطناعي عن بطاقة عضويته للهلال انتساباً برقم البطاقة 3999، والذكاء الاصطناعي هو لقب إيمانويل فلمو وليس هو البرنامج ـ عشان الموضوع يبقى ليكم واضح وما ندخل في جدل أن البطاقة (ذكاء اصطناعي).
ونحن على موعد مع هذا الجدل بعد أي هدف يسجله إيمانويل فلمو ـ المريخاب ح يقولوا عن الهدف اَأنه هدف عن طريق (الذكاء الاصطناعي)، وسوف يشككوا في الهدف.
الغريبة أنّ رقم بطاقة إيمانويل فيه ثلاث تسعات، يا متعلمين يا بتوع الكمبيوتر والنت، دا ذكاء اصطناعي والّلا ما ذكاء اصطناعي؟
يقولوا ليكم الحقيقة بتزعلوا، وتقعدوا تتنطنوا.
عموماً، ناس طبنجة وعوض زايد لقوا ليهم عذر.. يفوت منهم جان كلود يقولوا إنتوا عاوزننا نثبِّت لينا (جان)، يفوت فيهم أداما كوليبالي يقولوا (عفريت) ما في زول بقدر عليه، يفوت فيهم صنداي يقولوا (بعاتي)، يفوت فيهم إيمانويل يقولوا (الذكاء الاصطناعي) أمريكا ما قدرت عليه، نقدر عليه نحن.
وهناك الغربال وياسر مزمل وأحمد سالم وكبه ومازن فضل، ما عارف ليه بشعر بتعاطف مع كل الدفاعات التي سوف يواجهها الهلال، ومن هنا أعلن أنّ طبنجة وعوض زايد في مباراة القمة القادمة في عداد المفقود.
حصول القيصر إيمانويل (الذكاء الاصطناعي) على عضوية نادي الحركة الوطنية، هو انعكاسٌ للروح الجميلة الموجودة في الهلال، وهي تأكيدٌ للانتماء والمحبة وفي حب يا اخوانا اكتر من كدا.
بالمناسبة أنا أكتب عن إيمانويل كروح وكلاعب أضاف للهلال نوعاً من البهجة والمسرة، وأضاف في الجانب الآخر نوعاً من البهدلة والبشتنة وتداعي السهر والحمى.
حالتو دي (قاصر).
اللهم احفظ الهلال وغطى على لاعبيه، وافرحنا بهم وأسعدنا.
ما تقلبوا الصفحة عشان لسه ما وضعت نقطة في آخر السطر.
#اللهم_احفظ_السودان_وأهله
#جان_كلود_أجمل_هدف
