شاهدت هدف أماجوجو في المريخ، قدر ما حاولت أفهم الحاصل شنو ما قدرت؟
زي الكديسة وقت تظهر في آخر الفيلم الأجنبي ـ إنت عامل فيها مفتح ،طوالي بتقول الكديسة دي ما ظهرت ساي.
مرات يبدو لي رهاب رهاب أن مدافعين اثنين من المريخ دخلوا المرمى، حصل تصادم في الحلوق، في الوقت الذي خرج فيه أبوجا من مرماه، الناس ديل عكسوا الحكاية الحارس برة والمدافعين جوة، يمكن عشان الفريق اسمه (أماجوجو) عشان كدا شقلب الموضوع، وحصل (جوجوة) في البنكرياس، ومرات أشعر أن ذلك هو مجرد خيال علمي، لأن الواقع ما فيه (بهدلة) بالشكل دا.
زمان كنا بنركب الباصات ونمشي الخرطوم وكانوا بكتبوا لينا في التذكرة (العفش داخل الباص على مسؤولية صاحبه).. الموضوع دا كان ما واقع لينا، إلى أن شفنا هدف أماجوجو في المريخ.. الكلام وقع لينا تب.
أنا أول مرة أشوف لي هدف زي صحن المرارة، أي لاعب في حتة.
بعد المباراة ناس المريخ قالوا عندهم أربع ركب مفقودة.
الشغل دا بدون (جان) ، شغل (طبيعي).
تايو أكيري قالوا شال (المقاسات).
أربعة الدامر في كيغالي بتعمل كم؟
