عندما تكون شخصاً قاعداً ساكتاً وما عندك موضوع وما بتعمل أي حاجة رغم أنك مسجل ليك 17 محترفاً وبتعتمد على الأهلي مدني والفلاح وأم مغد ولجنة الدخيري في أكل عيشك وأهداف ونقاط مبارياتك، بتكون كدا زي الزول الذي يساهم مع أصحابه في العشاء بتصليح الفول.
كل دوره إنه بصلح الفول.
الزول البكون في كل سنة منتظر أخوه المغترب يرسل ليه رسوم الجامعة، وعاوز يعرس مع أخته عشان تكلفة العرس تكون واحدة، وما يعمل دعوتين.
زول عشمان صاحبه يطلعه معاه برة البلد، ووقت يكون عنده مشوار بشرك لركشة الجيران في طرف الشارع، عشان ود الجيران يجدعه معاه قدام.
زول بتاع ميتة لو لقى زول واقف في الثلاجة بقول ليه جيب لي معاك موية.. ولو مشى معاك الفرن بقرض نص الرغيف في الشارع.
ناس المريخ يعملوا في نفس الشيء عندهم 17 محترفاً وجهاز فني اجنبي وعايشين على الدخيري.
الطريف في الأمر أنهم وضعوا صورة داركو في البوستر بعد قرار لجنة الاستئنافات الفضيحة.. طيب الدخيري وين من البوستر؟ وهو ليه شهر بلف ويدور عشان يعمل الكارثة دي.
داركو عمل شنو؟
لكن الدخيري لو بقى (فأس) ما بكسر (المسمار).
الأسماء الموجودة في القائمة التي غادرت إلى رواندا بتعسكر في كيغالي وبتلعب في المكتب.
انتوا بتعسكروا لي شنو؟ وبطولاتكم كلها (شكاوي).
اخدوا راحتكم انتوا ما عليكم تكل.
وحتى تتضح الرؤية وتظهر الصورة، انظر إلى الاتحاد الرواندي الذي كرم الهلال ونجومه من منطلق الأرقام والانتصارات التي حققها الهلال، أما في السودان فإن ما يحدث هو تغزل لجنة عدلية في مذكرة واستئناف قدم لها؛ حتى الثناء والجوائز التي يحصلون عليها جوائز (مكتبية) لا علاقة لها بالملعب والعرق والجهد.
