لا ننكر أن المريخ هو الند التقليدي للهلال، مباريننا محل ما نمشي.. نمشي نلعب في الدوري الموريتاني يمشوا معانا.. نمشي نلعب في الدوري الرواندي معانا.. ويا ضلنا.. الناس ديل ما ح نترتاح منهم إلا إذا مشينا نلعب في الدوري الإنجليزي أو الإسباني.. في البطولة الأفريقية حدهم معانا الدور التمهيدي، عشان كدا نفسهم قصير، ما بقدروا علينا.
ومع أن المريخ هو الند التقليدي للهلال، لكن الفروقات بين الهلال والمريخ بي صراحة كبيرة وهي بتزيد يوم بعد يوم وبتكبر.
في الدوري الموريتاني الفرق بين الهلال والمريخ 24 نقطة.
في الدوري الرواندي الفرق بين الهلال والمريخ 16 نقطة.
في الدوري السوداني الفرق بين الهلال والمريخ (الدخيري).
الكلام دا في الكورة في الحاجات التانية ما في حاجة بتلمنا معاهم.. هم في مكانة ونحن في مكانة تانية خالص.
ولا بنجامل في الحتة دي.
نادي التربية ونادي الخريجين الأوائل أعلن عن تكريم أولى الشهادة السودانية والمتفوقين في امتحانات الشهادة السودانية هذا العام ـ ودي ناس المريخ لو “كتفوهم” ما بقدروا عليها ـ وهذا ليس غريباً على نادي للتربية، الجميل أن العادة جرت على أن يكون أول أو أولى الشهادة السودانية هلالابي أو هلالابية في كل عام، ونتوقع أن تكون أولى الشهادة السودانية تقى النور محمد النور هلالابية.. وهذا الموضوع نتركه لرمضان أحمد السيد.
نادي الحركة الوطنية أعلن عن نقل مباراته أمام إيغل نوار في كيغالي عبر تلفزيون السودان ومنصات الهلال على مواقع التواصل الاجتماعي مع منح الفرصة للقنوات السودانية لنقل المباراة على الهواء مباشرة ـ ناس المريخ فرحانين لأنهم نقلوا مباراتهم الأفريقية عبر منصة النادي ـ دي قدرتهم ـ شايفين نفسهم قلبوا الهوبة في الموضوع دا.
تلفزيون السودان الذي نقل المؤتمر الصحفي لوزارة التربية والتعليم لإعلان نتائج الشهادة السودانية سوف ينقل مباراة الهلال وإيغل نوار، ودي المريخ لو شربوه “قرض” ما بقدر يعملها.
سيد البلد في صفحته الرسمية أعلن عن اختيار 11 لاعباً من الهلال للمنتخب الوطني، في الوقت الذي أعلن فيه المريخ عن اختيار 4 لاعبين فقط للمنتخب الوطني، هذا الشرف لا يليق إلا بالهلال، دي لو “جنزروكم” ما بتلحقوا فيها الهلال.
باختصار ـ ما في حاجة بقت بتلمنا بيكم غير الكورة ولو ما الدخيري الكورة ما بتلمنا معاكم.
الزول الما بشجع الهلال مفروض يراجع نفسه ويهبش رأسه.. ولو قالوا ليك مريخابي اهبش رأسك.
