وصِبحت شايل بُقجتكْ
واقف علی باب الزمن
ضهبان تفتش للامان
وين الامان ؟
كل النهارات وجعتك / نعسانة ما بتشوف
وشمسك لمبة التلاجة ما بتضوی المكان
وانت فی رعشة بُرادك
جوعك الكافر جعان
ياااوحشتك .. ياااا لوعتك
الغُربة لوحة قديمة فی كتف الوكت
ألوانها اتسهكت زمان
ما شافها زولاً فی الطريق
ما مرّ عرافاً يفنده بی كلام
ياااحليلك .. ياااحليلك
وين شليلك
وين صِحابك شُلة الانس الزمان
كلو روَّح فی الحرابة
والحرلبة قليلة الزوق خرسة
مقطوعة لسان
بِمْ .. بِمْ .. وبِمْ
تو .. تو .. وتو
جفل الفراش / طار الحمام
وصِبحت شايل بُقْجتك
واقف علی باب الزمن
ضهبان تفتش فی الامان
كل النهايات سكتك
كل البدابات رحلة مجهولة مُرام
مفتوحة فی الافق البعيد
خدّاعة زی موية الرِهاب
لا بتوضيك لا بترويك من صيام
وصِبحت شايل بُقجتك
واقف علی باب المُدن
ضهبان تفتش للامان
وين الامان
وين الامان
وين الامان
