الكُويكلي ود سَعد، كُراعُو حارّة، مَكوة بَس! لَو دَخل عَليك بتأكُل في سَمك، يا السَّمك اتكَشح، يا اتعارَضت ليك شُوكة في حَلقك. لَو دَخل عَليك وإنتَ راقد ليك في مُكيّف، يا الكهرباء قَطعت، يا المُكيّف ضَرَب.
الكُويكلي ود سَعد قال لي: “أنا كُنت بشجّع شَمبات؛ شَمبات نَزلت. قال لي شجّعت التاكا؛ التاكا نَزلت. شجّعت الموردة؛ الموردة نَزلت. شجّعت الأهلي شندي؛ الأهلي نَزل”.
قُلتَ ليهُ: “هَسّة بتشجّع شِنو؟”
قال لي: “بشجّع المريخ!!!”
قُلتَ ليهُ: “اسكُت ما تقول كَلامك دا! ناس أبوذر إسماعيل وأمير عَوض وناصر بابكر لَو سِمعوا كَلامك دا برحّلوك من البَلد، ويقولوا عَليك (مُتعاون)”.
