ياجماعة نقول فعلاً محمد عبدالرحمن ” الغربال” خلاص إنتهى وماعندو حاجة يقدمها للهلال حسب وجهة نظر المشجع العوقة والقاعدين يستهدفوا اللاعبين لدرجة أنه بقى منهج وأسلوب حياة.
يعني تعاين كده تعاين كده، وتبدأ ترصد لعب باص غلط، وقع، جروهو، مابعرف يغطي، مابيعرف يعكس، رجع نفس اللاعب وعمل الفارق ومهم للمدرب في تنفيذ المطلوب منه زي ماقال الكتاب.
تكون هنا مثلاً، تتحرك بالمقاس من هنا لي هنا بين ده وده من اللاعبين، تضغط، وتضيق المساحات تحدد حركة الخصم، تطارد الحركة في إطار الكتلة دفاع وهجوم، كلو عندو دور عند الاستحواذ وعند فقد الكورة.
الكورة بقات بالمقاس بالامتار بالمسطرة والقلم أي خلل لو بتنقطها بيعمل خلل في الفريق وممكن يعمل نتيجة عكسية.
طبعاً المشجع العوقة أو الخاتي اللاعب في راسوا مابشوف ده، عندو بس اللاعب يكون مكتمل والكمال لله، وعندو لعيبة برضو غلطاتهم مغفورة، وده في الكورة مستحيل أنه ماف لاعب بقل مستواه أو يعود أقوى بعد تراجع، أو يغادر كلو كلو.
ماهي دي الكورة كده ماف لاعب بلعب ليوم الدين، عندها زمن مع الطبيعة وضد الطبيعة، عندها لاعب كبير مؤثر ولاعب في عمر الزهور ولا شيء مابعملوا.
المهم القرار عند منو أكيد ما المشجع العوقة ولا المستهدف اللاعب عند المدرب أو الإدارة حسب الثقافة الكروية.
محمد عبدالرحمن في النهاية موظف بعقد في الهلال عند عقد لغاية 2028 تقريباً الباقي مليون دولار أو أقل فشنو طالما انتو أصحاب قرار الاستمرار أو المغادرة يلا لموا المبلغ وادوهو باقي قروشو كاملة وقولوا ليهو يلا ورينا عجاج كرعينك.. بسيطة.
