عندنا قريبنا اسمه «العوض ود كويتلبي»، كان أيُّ زول يقول عاوز أعرس، بشجعه وبقيف معاه وبقول ليه: أنا بجيب ليك الفنان، الفنان خليه عليَّ.
وكان الزول وقت يعرس، قريبنا «العوض ود كويتلبي» بقيف يوم الحفلة في طرف الحلة، وأول ما عربية الفنان تدخل الحلة بفرقته الموسيقية، كان «العوض ود كويتلبي» بلاقاهم في مدخل الحلة وبجيبهم بيت العرس، ينزل مع الفرقة العدة والساونات، ثم يدخل على النسوان جوة، وهو بخوجل ويقول ليهن: “أنا ما قلت ليكم بجيب الفنان”، وهو دوره في ذلك أنه كان بوصف ليهم بيت العرس وبصل معاهم، وللأمانة كان بنزل معاهم الساونات.
الكلام دا وقع ليكم؟ قبل أن ننتقل لحتة تانية.
المريخاب عاملين قومة وقعدة بسبب مواجهة الهلال لأكاديمية بايرن ميونخ في رواندا، ومعتبرين أن هذه المواجهة سقطة في حق الهلال، رغم أننا نحن الهلالاب شايفين الأمر عادي، ومن ناحية علمية -قبل المناكفات- أنت في حاجة إلى أن تعرف كيف تتعامل مع الأندية الأضعف منك، مثلما أنت تحتاج إلى أن تعرف كيف تتعامل مع الأندية الأعلى منك، أو التي هي في مستواك أو قريبة منك، والهلال في كثير من البطولات والمواسم كان يُلدغ من جحر الأندية الصغيرة، وكانت مشكلتنا أننا نستهتر ونستخف بالأندية الضعيفة؛ لذلك نخسر منها أكثر من خسارتنا من الأندية الكبيرة.
مواجهة أكاديمية بايرن ميونخ في رواندا هي مفيدة للهلال من ذلك الإطار، خاصة أن الأندية الكبيرة أصبحت تعتمد على الأكاديميات بصورة كبيرة؛ لذلك المواجهة مهمة، ولا أستبعد أن يكون الهلال قصد من اللقاء اختبار أحد مواهب هذه الأكاديمية، أو ربما المباراة تدخل ضمن بنود صفقة بين الهلال والأكاديمية، ”دا شغل عالي بتوع التمهيدي لن يفهموه لنا“.
بعدين المريخاب زعلانين ليه؟ الهلال سوف يواجه أندية في ذات مستوى أكاديمية بايرن ميونخ في الفترة القادمة، أنتوا ماشيين بعيد ليه؟
أنا هسة جبت سيرة فريق؟ براكم ما عندكم ثقة في روحكم.
الهلال غلب الجيش الكبير 4 / 0، وغلب المريخ الكبير -أو الوصيف- 4 / 0، بينما غلب الهلال أكاديمية بايرن ميونخ 3 / 0… وهذا خلل، يفترض الهلال أن يغلب أكاديمية بايرن ميونخ 8 / 0.
يعني الأكاديمية أفضل من الجيش والمريخ.
اتركوا كل هذا، موسى حسين كانتي انتقل من المريخ للهلال، والدخول للجامعة لا بد أن يمر بمراحل تدريسية أدنى قبل الالتحاق بالجامعة؛ عشان كدا كانتي بدأ من الأكاديمية، وكانت مباراة أكاديمية بايرن ميونخ هي أول مباراة لموسى حسين كانتي في الهلال، الولد جانا من مرحلة الأساس أو من مرحلة التمهيدي، لا بد أن يمر بمرحلة الأكاديميات تلك، أنتوا فاكرين الموضوع لعب؟
عملنا كورس تقوية لكانتي في الأكاديمية.. عملنا ليه مراجعات قبل أن يدخل الهلال.
نحن أي حاجة عندنا بنظام.
الجميل أن كانتي سجل هدفًا (أكاديميًّا) بالورقة والقلم، هدفًا مثل حصة الكيمياء، فيه حسابات ومعاملات وحاجات تانية حاميني.. ”عشان كدا لعبنا مع أكاديمية“.
أنتوا عارفين المريخاب زعلانين من مواجهة الهلال وأكاديمية بايرن ميونخ ليه؟ عشان هذه المباراة شهدت الظهور الأول لكانتي، ”الليلة الصدمة عليَّ شديدة فقدت تلاجتي الجديدة“، وعشان كانتي سجل هدفًا مثل (يا قسيم الريد تعالي).
يا ريت الهلال يلعب مباراة أخرى مع أكاديمية بايرن ميونخ؛ عشان نشوف الناس ديل قصتهم شنو؟
أرجع ليكم لي «العوض ود كويتلبي» وإلا ما في داعي؟
صورة «البلدوزر» بالأزرق، أشعلت الحريق في «الرد كاسل».. في ناس قالوا عملت ليهم «حمى الضنك».
انظر للصورة إذا كنت «تمهيدابي» وزنك سوف ينقص سبعة كيلوجرامات.
