التميحة بنت سعد قالت ليهم دي ما عقرب.. دا كأس الدوري الرواندي.
كمان نحن ما بنعرف العقارب.
والشليخة بنت الطيب، اتعارضت ليها شوكة في حلقها.. قالت ليهم دي ما شوكة.. دا كأس الدوري الموريتاني.
كمان نحن ما بنعرف الشوكة.
ومليقة بنت عوض طقتها كهرباء، دخلت في غيبوبة 17 يوم، أول ما فاقت قالت ليهم دي ما كهرباء، دي أربعة دامر (المحروق).
كمان نحن ما بنعرف الكهرباء، هي الكهرباء نلقاها وين؟ عشان تدخلني في غيبوبة 17 يوماً، حليل الكهرباء.
نحن قاعدين كدا، جابوا لينا زول في نقالة بين الحياة والموت.
نحن افتكرنا الموضوع (مسيّرة)، لكن بي شوية الروح الفيه، فتح عينه الشمال ورفع رأسه وقال لينا دي ما (مسيّرة)، ما تعملوها في الجماعة ساكت.. دا (كانتي).
الليلة الصدمة علي شديدة.. فقدت تلاجتي الجديدة.
والله يا جماعة نحن في الحرب دي جربنا أي شيء:
نزوح.
لجوء.
عدس.
مسيرات نص الليل.
حمى ضنك.
شفشفة.
جغم.
تهريب.
طعون.
أي حاجة حصلت علينا، لكن أسوأ من (الوصافة) ما شفنا.
أي حاجة بتنتهي وبتروح.
كعبة (الوصافة)، خاصة وقت تجيب ليها (طعون) في الروح.
الهلال بطل كؤوس الدوريات المحمولة جواً.
خليكم قراب ما تمشوا بعيد.
