الأكيدُ أنَّ ناس المريخ فيما بينهم بيسألوا نفسهم: دي مصيبة شنو الوقعنا فيها دي؟.. معقولة نواجه الهلال مرتين في كيغالي والخرطوم؟
هو نحن عملنا شنو في دنيانا عشان نلاقي الهلال مرتين في أسبوع؟
إنتوا في زول داعي عليكم.
الجماعة يا دوب طالعين من الحرب، لقوا الهلال قدامهم في كيغالي وفي الخرطوم.
«والبحر خلفي والعدو أمامي».
مرقوا من كيغالي، لقوا الهلال قدامهم وش في الخرطوم.
وكمان بطائرة خاصة.
ما في طريقة يعردوا، الهلال قدامهم، وراهم محل ما يقبلوا يلقوا قدامهم الهلال.
دي مصيبة شنو؟
ما في أي طريقة لـ (كابو) بالردمية أو (زيكو) بالشنقيطي.
فريق «أماجوجو» الذي فاز عليه الهلال مرتين، مرة 8 / 0، ومرة 2 / 1، استطاع أن ينتصر على المريخ 1 / 0.. ما تقولوا لي «أماجوجو» انتصر على رديف المريخ؛ لأنَّ رديف الهلال تعادل مع «البوليس» الذي سبق أن تعادل مع فريق الهلال الأول.
المشكلة أنَّ إعلام المريخ كان قد ملأ الدنيا ضجيجًا وهو يتحدث عن مواهب المريخ، وعن أفضليتهم.. شارك بهم في دوري بربر، وخاض بهم المرحلة الأولى من الدوري الممتاز، وظل في الشهر الأخير يعلن بين اليوم والثاني عن وصول فوج من لاعبي المريخ إلى كيغالي.
الكارثة الأكبر أنَّ إعلام المريخ كان يسخر من الهلال لأنَّ رديفه لعب وديًّا مع أكاديمية «بايرن ميونخ» في رواندا، رديف المريخ اكتفى بمباراة ودية واحدة، بينما خاض رديف الهلال خمس أو ست مباريات تجريبية قبل أن يلعب أمام «البوليس».
الفرق بين الهلال والمريخ كبير، لكن بغالطوا.
في المريخ شعبة كاملة من مدراء الكرة، وهنالك جهاز فني أجنبي مترهل إلى جانب جهاز فني وطني، غير محمد حلفا ومجموعته، وفي النهاية رديف المريخ طلع مثل الفريق الأول للمريخ (لم ينجح أحد).
الفرق بين الهلال والمريخ في الدوري الرواندي أصبح (16) مع مباراة إضافية للمريخ.
المريخ تعادل (10) مرات وخسر (5) مرات في الدوري الرواندي.
مباريات القمة لا تخضع لمعايير الكرة ولا بتعرف حسابات المنطق، لكن رديف المريخ سوف يكون أمام مهمة انتحارية عندما يواجه رديف الهلال في يوم الجمعة القادمة في كيغالي.
شيلوا شيلتكم.
في الخرطوم يبدو الهلال أكثر جاهزية وأكثر رغبة لتحقيق الدوري السوداني بعد أن حقق الدوري الرواندي.
ناس المريخ لو عندهم عملية بناء أحسن يمسكوا فيها قوي؛ لأنَّ هذا الأمر هو العذر الوحيد لهم أمام عاصفة الهلال المرتقبة في كيغالي وفي الخرطوم.
المريخ لو خسر في كيغالي أمام الهلال ح يشيلوا عمر تنقا أم داركو للطيران؟
شامي لي ريحة إقالة.
مقالات ذات صلة
