ناس المريخ وصلوا من رواندا قبل أسبوع، عشان بطولة النخبة، وقالوا عملوا ليهم استقبال كبير، “شيء أغدًا ألقاك وشيء بعد الغياب”، وفوق كل هذا فإن المريخ حسب إعلامه، فريقه الذي يلعب به في الدوري السوداني هو (الأساسي)، ويتواجد في رواندا فريق المريخ (الرديف)، (حسب كلامهم)، بعد كل هذا الجماعة هنا الصدارة عندهم زي دكتور المرور، تمر عليهم في الأسبوع مرة.
عليك أمان الله، كرسي الصدارة عندهم زي كرسي النص، كل محطة لازم تقوم منه.
الهلال وصل قبل 48 ساعة من انطلاقة النخبة، ويلعب بالرديف، الأساسي في رواندا، (حسب كلام إعلام المريخ)، مع ذلك يتصدر الهلال الدوري في وجود فريق المريخ (الأساسي)، حسب كلام إعلام المريخ.
أساسي المريخ في السودان وصيف ورديف المريخ في رواندا في المركز الثالث.
والهلال بطل في الدوريين.
أنا جبت كلمة من عندي؟
مريخابي قال لي: “انتوا جيتوا بي طيارة خاصة، والمريخ اتمرمط في المطارات.. الطائرة الخاصة هي العملت الفرق”.
قلت ليه: “وانتوا الطائرة الخاصة عميانين منها، كمان الطائرة الخاصة بقت (جنسية)”.
