نحن ماعندنا مشكلة كهرباء ماف ليها تلتين، مالو خلينا تبقى ستين، وفي ستين كلو كلو قول ماجات ذاتو يعني شنو؟. ، الله ماشقالوا حنكا ضيعوا، اي شيء يموت زراعة التموت، بهيمة التموت زول ذاتو اليموت، ماهو كمان الموت ما الا تدفنو.
في حياة أخير منها الموت، دي ذاتها مامشكلة الماتوا شوية، جثث كتيرة حايمة، ولا أي شيء، ياهو عايشين منتظرين اليوم ولحدي ما ربنا ياخد أمانتو، عندكم البطمنوكم وبتكلموا بلسانا ليكم ( هو في زول مات من الجوع؟).
أبداً .. اصلوا ماتشيلوا همنا نحن قاعدين، وين؟ وين كيف؟ قدام الدكاكين، في السوق في التحتانية، البجينا غاشي ولا ماشي، ورجغ ورجغ ورجغ ورجغ، ماف جملة مفيدة، ياها قالوا وقلنا وأعتقد وافتكر، والمبرراتية، ولسانكم اييييك.
كمية المخذلين، والمتبرعين، وعندي مهندس وزول من جوه السد، والمدير قال، أما ناس يوم القيامة ونفسي نفسي، وطاقتي وطاقتك ديل رصيدكم، ماكتار لكن صوتهم عالي، نحن لامنهم عليكم، هم هم همهم حليت مشكلتي، يبقى البحصل بعد داك مامشكلتي.
اطمنوا من ناحيتنا كم نفر بوزنوا الباقين قادرين يرفع صوتهم ويقولوا محل الوجع وين؟ وأنتو ولاحاجة غير مجموعة لصوص وكتالين كتلا.
ومع ذلك ماتشيلوا هم أنتو مسؤولين عننا، ويعني شنو لو الكهرباء ماجات والشمالية راحت في حق الله يعني شنو؟.
اطمنوا من ناحيتنا يوم التقولوا الكهرباء جات نفرح فرح نغني ونزغرد ونقول كالعادة ياسلاااام ماقصروا اهو لسه متذكرننا.
